Ka kynhun ialehkai phutbol jong ka Assam Rifles mynta ka sngi ka la ioh ban rah ia ka nam lahduh ha ka phainal jong ka lympung ialehkai phubtol kaba la ai kyrteng Assam Rifles Sentinels Cup, 2024 kaba ar, kaba la pynlong ha Laitkor Garrison jong ka nongbah Shillong hadien ba ka la lah ban pynliem noh ia ka kynhun ialehkai jongka 165 Territorial Army (TA) ha ka jingiakhun kaba itynnad bad shongshit bha.
Ha kane ka sngi ba la pynhap pyrda ia kane ka lympung ialehkai phutbol, la wan ban iadon ryngkat da u Lieutenant General Pradeep Chandan Nair, PVSM, AVSM, YSM, PhD, uba dei u Director General jong ki shipai ka Assam Rifles kum u kongsan ha ka jingiadon ryngkat kiwei kiwei de ki heh shipai bad ki nongpeitkai.
Kum ban shu kdew hangne, ia ka wat kaba nyngkong jong kane ka lympung ialehkai la sdang ha ka 1 tarik jong u bnai Naitung, 2024 ha ka nongbah Imphal jong ka jylla Manipur. Kumba hynniew tylli ki kynhun kiba kynthup na ka jylla Arunachal Pradesh, Nagaland, Mizoram, Meghalaya nalor ki kynhun jong ka Assam Rifles, 164 Territorial Army (Home & Hearth) bad ka 165 Territorial Army (Home & Hearth ) ki la wan ban iashim bynta ha kane ka lympung.
Ka Assam Rifles, kaba dei ka tnad shipai jong ka ri kaba kam sngewsarong ialade kum kata ka ‘Friends of the North East” lane ka paralok jong ka thain shatei lam mihngi ka ialeh katba lah ban kyntiew ia ka kam ialehkai, kaba dei kawei ka lad ban ai mynsiem ia ki samla ba kin lait na ki kam dih drok bad ki kam pyntriem bad ruh ban sei ia ka sap ka phong ki khun samla ka thain ba kin lah ban kiew shaphrang ha ka lawei ka jongki.
Ka Asam Rifles ka don ruh ia ka jingiasoi sngewthuh jingmut lane ka Memorandum of Understanding (MoU) bad ka Bhaichung Bhutia Football Academy ha ka Assam Rifles Public School (Sports) na ka bynta ban sei ia ki sap ki phong jong ki samla ialehkai phutbol ka thain shatei lam mihngi da ka jingthmu ban pynkhlain shuh shuh ia ka thong jong ka sorkar India lyngba ka Khelo India Abhiyan bad Fit India Movement.
