Haduh 6.5 Ton u Sohtrun la lah ban pyniaid iew, kaba dei ha ka sien kaba ar, ba ka sorkar Meghalaya ka la pynlong ia ka tamasa die ne pyniaid iew ia u Sotrun ba la pynlong ha Nongbah Delhi bad kaba la kut noh ha ka Sngi U Blei.
U Myntri rangbah ka jylla, u Conrad K. Sangma kum ka jingai mynsiem ia nongseng kam seng jam la jong, kiba la shim bynta ha katei ka Tamasa die sohtrun, ha ka sngi u Blei u la leit ruh ban jngoh da lade ia ki dukan pyni nam ia u sohtrun ha katei ka tamasa kaba long ruh kum ka jingai mynsiem ia kito ki nongseng kam seng jam na ka jylla Meghalaya kiba la leit ban shim bynta ha katei ka tamasa die sohtrun ha Delhi.
U Myntri rangbah ka jylla, u Conrad K. Sangma, u la ban jur ba ka sorkar Meghalaya ka la mang pisa haduh 5.63 klur na ka bynta ki jingtei ba donkam bad Rs. 1.39 klur na ka bynta ka jingpyntreikam bad ruh Rs. 78 lak la mang kyrpang na ka bynta ban pyniaid iew ia u Sohtrun. Lyngba katei ka jingmang tyngka sorkar ka la wan rah ka jingjop na ka bynta ban kyntiew ia ki nongrep Sohtrun, namar 4.36 MT u Sohtrun la shalan sha ka Lulu Group Abu Dhabi. 300 MT la shalan sha ki ri ka thain Europe bad lyngba kane ka jingshim khia ka sorkar ka la kyntiew ruh ia ka ioh ka kot ki nongrep na ka 30-122 percent bad haba khein kyllum kumba 5000 ngut ki nongrep Sohtrun ki la ioh jingmyntoi.
U Myntri rangbah, u la pynpaw ruh katto katne halor ki jingdon ki Karkhana Sohtrun bad la pyntip ruh ba ka sorkar ka la seng haduh 11 tylli ki Collective Marketing Centre (CMC), 338 Integrated Village Cooperative Societies (IVCS) bad 28 tylli ki Organic Farmer Producer Organizations (FPOs), ki la don ha ka jylla, na ka bynta ban pynsuk ia ki nongkhaïi ba kin suk ban leit thied ia ki Sohtrun ba pynmih da ki nongrep ka jylla.
Da ka jingthmu ban kyntiew ar shah ia ka ioh ka kot ki nongrep, ka sorkar ka la shim khia ruh ban wan rah ia kata ka ‘mission-mode interventions’, na ka bynta kito kito ki mar rep kiba iaid iew bha, ong u Myntri rangbah ka jylla, kane ka thong lyngba katei ka Mission-mode intervention kin hap lang naduh u Shynrai, u Syieng, u Tit, ka kam ri ngap, ki musli musla, u Sohniamtra Khasi, u Sohtrun bad kiwei kiwei.
U la pynshai ruh ba ka sorkar Meghalaya lyngba ka jingkyrshan ka sorkar jylla ka la thaw lad ban ai ram sha ki nongrep ba la mang haduh Rs. 78.82 Lakh na ka bynta u jong u snem 2023-24, na ka bynta ban buh thong kumba 540 MT ban ioh pyniaid iew ia u Sohtrun sha bar ka jylla bad Rs. 8.12 Lakh la dep ban pynlait kum ka jingpyrshang ban pyniaid iew ia u Sohtrun, ba la kyrshan ban lah ban die ia u Sohtrun haduh 22.3 MT ha u snem 2023.
U la ong ruh da ka jingseng ka sorkar ia ki 6 tylli ki Processing Unit la lah ban pyniaid iew haduh 1160MT ha ka shi snem, la kyrshan ruh lyngba ka jingmang tyngka ka sorkar kaba Rs. 5.63 crore, ka la iarap ruh ban don ki Karkhana ban lah ban pynmih umsoh khamtam u u Sohtrun. U la kdew ruh lyngba ka Community Public Private Partnerships (CPPP), kaba long shi bynta ban poi sha kata ka thong ba la buh ban kyntiew ia ki nongrep.
Ka Meghalaya ka la kyntiew ruh lyngba ka Umdihar IVCS ban iateh lok bad ka IQF Pvt Ltd, Karnataka, kaba dei ka Karkhana kaba lah ban buh ia ki Sohtrun ha ki jaka ba la buh kyrpang bad ba la pyndait thah lyngba kata ka CPPP model. Ka Umdihar kum ka jaka pdeng ka la lah ban pynmih 400 MT (2023-24) kita ki Sohtrun ban pyniaid iew lyngba ki 24 Co-operative societies na ka jylla. U la ong ruh lyngba kane ka IVCS ha Umdihar la lah ruh ban shalan ia u sohtrun sha ki ri haka dewbah Europe ban shna ruh ia kita ki kynja jingbam na ka bynta ki khyllung.
U la pynpaw ruh ba kane ka tamasa ba 5 sngi ha Delhi, la sakhi ia ka jingwan poi ki nongjngohkai pyrthei ba la kot ki hajar ngut ban mad ia u Sohtrun ba khlem da pyndonkam dawai bad ruh ka pyni lyngba ki sakhi (Live) jong ki nongrwai bad ki nongput nongtem na ka Meghalaya Grassroot Music Project (MGMP) kum u Leonard H. Syiemlieh bad Ahaia. Ka long ka jingsah jingkynmaw, ba haduh 6.5 ton la lah ban pyniaid iew ia u Sohtrun naduh ka ba sdang ka tamasa haduh ba kut ka tamasa. Haduh 10-ton u sothruh la lah ba shalan ha kane ka tamasa sohtrun jong u snem 2024.
