U MLA ka Nongpoh Constituency ryngkat bad u MDC mynta ka sngi ki la leit ban ia kynduh kyrpang ia u Deputy Commissioner ka Ri Bhoi bad ruh ia u member Secretary, na ka bynta ban pynsngew halor ka jngpynslem palat ban pynmih ia ka result jong ka DSC post jong u snem 2020-2021.
U MLA ka Nongpoh, u Bah Myaral Born Syiem ryngkat u MDC, u Bah Balajied Rani, ki la shim ruh ia kane ka bynta ban leit kynduh ia u Deputy Commissioner ka Ri Bhoi, u Abhilash Baranwal bad u member Secretary, u Raja Brahma, ka dei hadien ba la bun ki samla wad kam bad ruh wat ki kmie ki kpa ki la ud sha u kum u nongmihkhmat halor ka jingslem palat ban pynbna ia kane ka result jong ka DSC post ha Ri Bhoi.
Ha kane ka jingiakynduh, na ka liang u MLA bad MDC ki la ioh ban ia tai sani ryngkat u DC bad uba dei u Charman ka DSC bad ruh u Member Secretary u Raja Brahma, ha kaba ki la kular ban shim khia na ka bynta ban pynsted noh ha kaba pynbna ia ka result bad kumba la mih na kane ka jingiakynduh lang, ka daw ka jingslem ban pynbna ia ka result ka dei namar ka roster system, ba bun ki tnad sorkar ha Ri Bhoi kim pat lah ban pynkhreh ia ka Roster system.
Haba kren sha ki nogthoh Khubor, u MLA ka Nongpoh, u Bah Mayral Born Syiem, u la ong ba ha kane ka jingiakynduh ka la long kaba sngewkmen, namar hadienba la iatai sani halor ka jingshlem ka result jong ka DSC post jong u snem 2020-2021, na ka liang u DC kum u Charman ka DSC bad u Member Secretary ki la kular ban shim khia bad la kumno kumno ba ia ka result jong kane ka DSC Post dei ban pynbna noh ha u bnai Nailur ne Nailar jong u snem 2024.
U la ong ruh ba na ka liang jong u kum u MLA, u la kren ia u DC ba un kham phai khmat shwa ia ki samla na Ri Bhoi halor kane ka jingthungkam, namar ka DSC Post ka dei kaba hap mang kyrpang tang I aki samla ba dei trai District bad da kaba ong kumta, kam shym mut ban wan rah jingiapher jaid bynriew bad kiwei kiwei ki samla na shabar ka District ki don la ka jong ka DSC Post.
Shuh shuh, u la bynrap ruh da kaba ong, ba ha kane ka sngi, na ka liang jong u kum u MLA u la kyrpad ruh ia u DC ka Ri Bhoi ba wat ia kiwei kiwei ki post ba dang lait kam ha Ri Bhoi, dei ban pynbna paidbah noh lyngba ka Advertisement khnang ba kan long ka jingailad ia ki samla kiba ym donkam don jam hapoh ka District bad u la kyrpad ruh wat ha ka liang ka thungkam thungjam ruh dei ban leh da ka lynti kaba khuid kaba suba khnang ban ai jingmyntoi ia ki samla wad kam katkum ka jinglah jongki ha ki examination bad personal interview, u la bynrap.
