Kumba 26 ngut ki nong wan trei iaka surok na Nongstoin-Rambrai-Kyrshai ki ba dei na bar jylla ki la shah beh krad ha ka Khasi Students Union jong ka West Khasi Hills District Unit bad Rambrai Cirle mynta ka sngi ka 16 tarik Naitung namar ba kim shim la don ia Work Permit.
Ha ka jingpyntip jong u Organising Secretary ka KSU u Wanbhakupar L. Nonglait, la iathuh ba kine ki nongwan bylla kiba na bar jylla ki dei ki ba la wanrah da ka kompani Spica, ka ba pyntrei iaka projek shna surok jong ka NHIDCL na Nongstoin-Rambrai-Kyrshai.
Ha katei ka jingleit khynra ka KSU ka la pyntip ba kumba 26 ki nongbylla ki la pynkhein ia ka Inner-State Migrant Workmen Act, 1979 (Work Permit) kaba la pyntreikam ha ka jylla naduh u snem 2011. Ka KSU ka la pyntip ruh ba 6 ngut na kine ki nongbylla ki khlem shim la ruh ia ki kot ki sla kiba dei ban pynshisha ba ki dei ne em ki nong India.
Ka KSU ka la shim khia ia kane bad maham jur ruh wat ia ki kontraktor ba ki dei ban pynbiang ia ki work permit jong ki nongtrei bar jylla ha shwa ba kin wanrah ban pyntrei ha ka thain bad lada kim leh kumba la bthah kumta ka seng kan shim da ki lynti kiba tyngeh.
Ka Seng KSU ka la pyntip ruh ba kan nang iai bteng ban pynlong ia ki jingkhynra ha kylleng ki ja ka jong ka District ban pynthikna ia ka jingtreikm ba pura ia ka aiñ Inter-State Migrant Workmen Act, 1979 haka jylla.
