Ka Khasi Student Union (KSU) sengkmie, ka la ioh ban pynskhem ia ki nongkitkam ba pura ka KSU North Khasi Hills District Unit, ki ban sa treikam ia ka seng na bynta ka samoi treikam jong u snem 2024 haduh u snem 2027.
Ia kitei ki nongkitkam ka KSU NKHD, la wan ban pynskhem da u Samla Lambokstarwell Marngar, President rangbah ka KSU Sengkmie, ha ryngkat ka jingdonlang kiwei ki dkhot ka KSU Sengkmie, lem bad ki nongialam na kiwei pat ki seng, kiba kynthup ia u Bah Bipul Thangkhiew, President rangbah ka RBYF, u Bah Luistar Lyngdoh, President ka FKJGP NKHD lem bad kiwei.
Ia ka jingpynskhem ia kitei ki nongkitkam ka KSU,NKHD, la pynlong ha District Library Nongpoh, ha kaba baroh ki nongkitkam ba thymmai ka KSU bad kiba dang shu shah jied dangshen, ki la poi ryntih ha katei ka sngi.
Ki nongialam kiba la shah pynskhem ha katei ka sngi, ki kynthup ia u Samla Ferdynald K. Kharkamni, kum u President, u Samla James Hitler Mawphniang, kum u General Secretary, u Samla Joseph Lambok Rymbai, kum u Vice-President lem bad kiwei pat, kiba bat ia kiwei ki nongialam kiba bat ha ki kyrdan bapher bapher.
Ki nongai jingkren ha katei ka sngi, kiba kynthup naduh u Samla Lambokstarwell Marngar, nangta kiwei ki nongialam na kiwei ki seng lem bad kiwei ki riew rangbah, haba ki ai jingkren ha katei ka sngi, ki la ai ka jingkhublei kitbok kitrwiang ia kitei ki nongkitkam ba thymmai ka KSU, NKHD.
Ki la kyntu ruh ia kitei ki nongialam ba la shah pynskhem, ba ki dei ban long kiba sngewrit bad nalorkata ba ki dei ban treibha na bynta ka bha ka miat ha ka imlang sahlang bad khamtam eh na bynta ban iada ia ka ri bad Jaidbynriew.
Ha katei hi ka sngi, ba la pynskhem ia kitei ki nongkitkam ba pura ka KSU, NKHD, la don ruh ka jingpynkup burom ia kito ki dkhot ba shitrhem ka KSU bad kiba la shim ia ka rai ban shongthait noh na ka seng.
