Ka FKJGP North Khasi Hills District Unit mynta ka sngi ka la pynpaw ia ka jingbitar kaba jur, halor ka jingbym burom ka kynhun siat tim ha Khanapara ba la tip kum ka Meghalaya Marwet Archery Association, kaba la kynnoh ba kam ithuh satia ia uta u Syiem Tirot Sing Syiem, uba ka jaid bynriew Khasi ki burom kum u syiem ba khraw, uba ia khun ban pynlaitluid na ka jingsynshar donbor ki dohlieh.
Kaei kaba pynsngewsih bah ia ki nongialam ka FKJGP, North Khasi Hills District Unit, ka dei ka jingkren heh bad kren meng ki nongialam katei ka Meghalaya Marwet Archery Association, ha kaba ki la phai ktein ia ki nongialam ka seng FKJGP, da kaba ong ba kim ithuh satia ia uta u Tirot Sing Syiem, ba ka seng ka la leit khang mynta ka sngi ia ka jingsiat khnam ha Khanapara, kiba ym burom satia ia kane ka lyngkhuh sngi iap ba 189 snem ka jingiap u Tirot Sing Syiem kum u syiem ba khraw ba la burom da ka jaid bynriew Khasi.
Ki nongialam ka seng FKJGP North Khasi Hills District Unit, ha ka jingialam u Publicity Secretary u Bah Ricky Mawjaw bad ruh ba la synran lang da ka jingdon lang ki nongialam ka FKJGP Baridua ba kynthup ia U Bah Rink Sohpdang president, U Bah R. Sohpdang, U Bah Komol Shakwa bad ki dkhot, ki la leit sha katei ka jaka siat khnam da ka jingthmu ban phah khang bad ban burom ia kane ka sngi kyrpang, ba wat ka sorkar Meghalaya ka la pynbna shuti, hynrei kaei kaba snngewsih, ka long ba ki nongialam katei ka Meghalaya Marwet Archery Association ki la kren heh bad pyni bor da kaba ong ba kim tip satia uei uta u Tirot Sing.
Haba kren sha ki lad pathai khubor, U Bah Ricky Majaw, u la ong ba ka jingpynibor jong uwei u nongialam katei ka Association ka la pynbitar shisha ia ka seng, ha kaba u la nud ruh ban ong ba ka Association kam tip satia uei uta u Tirot Sing Syiem bad kane ka paw shai ba ki bar jylla kiba pyniaid ia katei ka kam siat khnam ha khappud kim burom satia ia ki Khasi bad ki la nud ruh ban pyni bor bad krem tohmet wat ia u Syiem, ba ka jaid bynriew Khasi ka burom kum uta u syiem ba khraw bad wat ka sorkar jylla ka burom da kaba pynban shuti ha kane ka lyngkhuh sngi iap kum ka jingburom ia une u Syiem, uba la aiti ia la ka jingim na ka bynta ka jinglaitluid ka jaid bynriew.
U la ong ruh ba ka seng ka buh ruh ka jingkylli sha ka sorkar jylla bad sha ka KHADC, ba hato kane ka kynhun ka lah ban leh katba ka mon, namar kumba mynta ka sngi kum ka jingburom ia u Tirot Sing, la pynbna shuti ban kynmmaw burom ia kane ka lyngkhuh sngi iap ba 189 snem u Tirot Sing Syiem, ha kaba wat kiwei kiba thoh tim ha ka jylla ki khang ia ka jingtreikam, hynrei kitei ki nongialam ka kynhun siat khnam ha Khanapara ba la pyniaid da ki bar jylla ki la nud pynban ban kren bein bad pynibor da kaba ong ba kim ithuh satia ia uta u Syiem Tirot Sing kaba log ka jingkhein poh ia ki riew khraw ka jaid bynriew.
Shuh shuh, u la ong ruh ba ka seng nangne shakhmat ka la maham tyngeh ba lada katei ka kynhun ka dang pyni bor bad khein poi ia u riewkhraw ka jaid bynriew, kum ka seng kam banse ban shim da ki lad kiba tyngeh bad lada jia ei ei ki hap ban shim ia kata ka jingkitkhlieh ba kum ka seng kam kwah ba ki bar jylla kin khein poh ia ki nongialam ba khraw ka jaid bynriew, u la bynrap.
