Kam mih ka jingkylli ban khang ne khanglad ia ki kali ban kit ia ki nongjngohkai pyrthei sha Meghalaya, namar kiba bun ki kali ki iaid katkum ki kot ki sla ba ki lah ban ïaid ne kamai ha baroh kawei ka ri (National Permit) lane la kumno kumno lai tylli ki jylla (State permit).
Ïa kane la pyntip da u myntri ba dei peit ïa ka tnad jngohkai pyrthei jong ka sorkar Meghalaya u Bah Paul Lyngdoh hadien ka jingïakynduh bad ki heh ophisar ka tnad jngohkai bad ka kit ka bah nalor ki bor synshar district.
Kane ka rai ka long hadien ka jingdawa jong ka All Khasi Meghalaya Tourist Taxi Association (AKMTTA) ban khanglad ia ki kali jngoh kai pyrthei na Assam ban kit ia ki nongjngoh kai pyrthei sha ki jaka jngoh kai pyrthei bapher bapher ha kane ka jylla.
“Kam don jingkylli ban khang ïa ki kali nongwan jngohkai ban leit sha Meghalaya. Phi hap ban buh ha ka jingmut ba kine ki kali kamai ki don ïa ka national permit lane lai tylli ki states permit” ong u bah Lyngdoh.
U Bah Lyngdoh u la pyntip ba ka tnad kan sa iakren shwa bad baroh ki nongkitkam ha kaba ia dei bad ka jingdawa jong ka AMTTA ban pynthikna ba kino kino ki sienjam ba ka sorkar Meghalaya ka shim kim dei ban don ka jingktah kaba sniew.
U myntri u la pyntip ba ka jylla ka la sakhi ia ka jingkiew jong ka jingwan jngohkai pyrthei man la u snem, katba ka jingdawa kali ka dang sahkut.
U la bynrap ruh ba ka Assam namar ba ka dei ka khyrdop sha ka dong shatei lammihngi jong ka Ri India, kan nym long kaba lah ban khang ia ki kali nongwan jngohkai ban leit sha Meghalaya.
U myntri u la ong ba ym dei tang ki nongjngohkai pyrthei na Assam kiba wan sha Shillong hynrei ki briew na Meghalaya ruh ki leit sha ki bynta jong ka Assam, la ka long kum ka kam jngohkai pyrthei ne na ka bynta ban pule puthi bad kiwei kiwei.
