Ka Catholic Management Committee (CMC) jong ka Block – C, ha ka dong Mersohbhala ba hap ha ka Umsning Parish, ka la rai ban pynlong da ka Freedom Fest, kaba dei shi bynta ka jingangnud ban pynmih pisa na ka bynta ban shna ia ka ïingmane.
Ia kane ka Freedom Fest la rai ban pynlong ha ka 15 tarik u Nailar 2024 ha CFC Hall jong ka Umsning Parish. Ki nongrwai ba pawnam jong ka jylla jong ngi kin wan ban rwai naduh ka por 2 baje noh phai sngi.
Kumba la pynpaw da ka Kong Reeta Dahunlin Sunn, kiba dei ki nongpyniaid ka CMC Block – C, ka la pynpaw ba ka thong jong kane ka Freedom Fest ka long ban pynmih pisa na ka bynta ban kyrshan ia ka Balang dong Mersohbhala ban shna ia ka ingmane, kaba long ka jaka kyntang na ka bynta ban mane ne ai nguh ia U Blei Nongbuh Nongthaw.
La ong ruh ba nalor ka ïingmane, kin don ruh ki jaka ai jinghikai ba kyrpang ia ki samla, ki long kmie – longkpa bad ruh ia ki khynnah rit ym tang ha ka jingngeit ne mane blei, hynrei ban don ki jaka ao jinghikai bapher bapher kum ka shongkha shongman, ban kiar na ki jingmlien ba sniew kum u drok, ban kyntiew ia ka pule puthi, ban ai jinghikai halor ka seng kam seng jam, ban sumar sukher ia ka mei mariang bad ki wei ki wei pat.
Kumta, na ka liang ka CMC Block – C, ka khot ka wer ia ki paralok parajor ba najan bad na jngai ba kin wan ban ai jingkyrshan bad ban shim bynta ha kane ka freedom fest, khnang ba ka jingthmu ban shna ïingmane kan long kaba jop.
