“Ki nongjngohkai pyrthei haba ki wan sha ka jylla Meghalaya, kim dei ban iohi shwa ia ki jaboh jabain shuwa ban poi sha Shillong, kaba dei ka nongbah jong ka jylla” ong u Assistant Rangbah Shnong ka Shnong Umiam, u Bah Imti Chuba Iawphniaw, haba kren hadien ka jingpynkhuid ia ki sawdong sawkun ka Shnong Umiam ba la ia trei ryngkat bad ka Tornado Security Agency bad ka Dorbar Shnong Umiam.
Ka Dorbar Shnong Umiam ryngkat ka Tornado Security Agency, ki la pynlong ia ka jingpynkhuid shnong, ka dei ha ka 17 tarik u Naitung 2024, kaba dei ruh ka lyngkhuh sngi iap ba 189 u Syiem Tirot Sing ba ka kynhun Tornado Security Agency, Shillong ryngkat ka Dorbar Shnong ka la pynlong ia ka jingpynkhuid paidbah ia ki bynta jong ka Shnong Umiam khamtam ki jaka ba ju wan poi ki nongjngohkai pyrthei.
Haba kren sha ki lad pathai khubor, u Bah Imti Chuba Iawphniaw, u la iathuh ba ki jaka ba la pynkhuid da ka Tornado Security Agency bad ka Dorbar Shnong Umiam ki kynthup ha ka jingkieng ba la pynsangeh ia ki Bus jong ki nongjngohkaki pyrthei, ba dang iaid ka jingmaramot ia ka jingkieng heh bad ki rud ki kiar jong ka pung Umiam, namar ka jingbret jaboh pathar da ki paidbah ka la ktah shisha ia ka burom jong ka shnong, ha kaba wat ki bor sorkar ruh kam pat leh ei ei ban pynkhuid ia kitei ki jaka paidbah, kiba long ruh kum ki jaka jngohkai pyrthei.
U la ong ruh kum ka Dorbar Shnong, ka ai khublei kyrpang ruh ia ka kynhun Tornado Security Agency na Shillong, namar ki don ia kata ka mynsiem ban ia trei lang na ka bynta ban wan rah ia ka khuid ka suba bad khamtam ka jingkloi jongki ban pynlong ia kane ka jingiapynkhuid paidbah ia kiba bun ki jaka paidbah ha ka shnong Umiam ka long shisha ka nuksa ka jinghikai ba ngin sngewthuh ia ka jingkordor jong ka khuid ka suba.
“Ka Shnong ka dap ruh da ka jingsngewkhia ba naduh ba la maramot ia ka Jingkieng Heh ha Umiam,, kiba bun ki Kali heh kim ioh shuh ban iaid na katei ka Jingkieng, khamtam ki Bus kiba kit ia ki noingwan jngohkai pyrthei bad namar ba la hap ban pynsangeh ha Umiam, ki katto katne ki bynta jong ka shnong ki la dap da ki jaboh, namar ka sorkar kam shim khia ban pynkhuid bad kam don ruh wat ia ka Painkhana paidbah, kaba la long ka jingma ia ka koit ka khiah bad ruh ia ka mei maraing namar ka jingbret pathar ia ki jaboh” ong u Bah Imti Chuba Iawphniaw.
Namarkata, na ka bynta ka khuid ka suba, ban da ruh ia ka burom jong ka jylla Meghalaya, kaba dei ka jylla kaba pawnam ha ki jaka jngohkai pyrthei, ka Dorbar Shnong Umiam, ka kyrpad ia ki paidbah ba kim dei ban bret pathar ia ki jaboh ba ka ktah ia ka koit ka khiah bad ruh ia ka mei mariang bad na ka liang ka Dorbar Shnong ruh ka kyrpad ia ka sorkar ba kan shim khia na ka bynta ban pynbiang ia ki painkhana paidbah ha kitei ki jaka ba bun ki nongjngohkai pyrthei, khnang ba kan nym ktah ia ka nam ka burom jong ka shnong bad ka jylla hi baroh kawei kaba la paw kum ka jylla ba paw ha ki kam jngohkai pyrthei.
