U Myntri rangbah ka ri, u Narendra Modi ha ka khubor sngewlem kaba u la phah halor ka jingkhlad noh ka Kamla Pujari, u la pynpaw ia ka jingpangnud halor kane ka jingkhlad kane ka Longkmie, kaba dei kawei na ka Longkmie kaba la noh synñiang ha ka kam rep ka kam riang.
Kum ban pynkynmaw, kane ka longkmie na Odisha ba la tip kyrteng kum ka Kamala Pujari, ka la khlad noh ha ka 20 tarik u Naitung 2024 hadien ka jingshah sumar jongka ha ki Doctor. Kane ka Longkmie ka la dei ruh kawei na ka Longkmie na ka jaid bynriew riewlum na Odisha, kaba la ioh pdiang ruh ia ka khusnam Padma Shri ha u snem 2029, halor u synniang u bynhei ba ka la synniang na ka bynta ban kyntiew ia ka kam rep ka kam riang hapoh ka ri India.
Haba phah ia ka khubor sngewlem halor kane ka jingkhlad noh kane ka Longkmie, kaba la 76 snem ka rta, u Myntri rangbah ka ri, u Narendra Modi, u la pynpaw haka rynsan X, da kaba ong ba ka long shisha ka jingpang nud halor ka jingkhlad noh kane ka longkmie, namar kane ka longkmie ka dei kawei na ka longkmie na ka jaid bynriew riewlum kaba la don ka bynta kaba khraw ha kaba kyntiew ia ka rep ka riang.
U la pynpaw ruh da kaba ong, kane ka longkmie ka dei ka longkmie kaba kyntiew ruh ia ka kam rep kaba khlem da pyndonkam dawai (Organic farming) bad ka dei ruh ka longkmie kaba ju ri ju sumar ban iada ia ki symbai jingthung kiba long tynrai khnang ba kin nym duhjaid.
U la ong ruh ka ki kam ki kti ba ka trei na ka bynta ban pynriewspah na ka bynta ban pynneh ia ki rukom rep tynrai ba khlem da pyndonkam dawai kin iaid sah bad iai neh shi junom bad ka dei ruh kawei na ka longkmie ha ka ri kaba pynkhain ia ka jingialong shi tylli ki jaid bynriew riewlum hapoh ka ri India, u la bynrap.
