Namar ka jingshah ktah palat ki paidbah ka dong Ri Bhoi, kaba dei na ka jingthud palat ka bording ilektrik ha Ri Bhoi, ka Ri Bhoi Dorbar kum kawei ka synjuk ki riew rangbah, ka la rai ban phah noh da ka dorhas sha u Myntri ka tnad Bording bad kumjuh ruh sha baroh ki MLA bad ruh ia u Deputy Commissioner ka Ri Bhoi, kaba dei halor kane ka jingshah ktah ki paidbah ka dong Ri Bhoi na ka jingthud palat ka bording ilektrik.
Kane ka jingshim rai ka Ri Bhoi Dorbar ban phah jingthoh ne ka kynja dorkhas sha ka sorkar halor ka jinglip bad ka jingthud palat ka bording ilektrik, ka dei namar ba ki paidbah ha Ri Bhoi ki la syrtok shisha na ka jingthud ka bording kaba ki paidbah kim ju ioh satia ia kata ka bording kaba thikna.
Haba ia kren sha ki lad pathai khubor, u President ka Ri Bhoi Dorbar, U Bah R.B Shadap, u la ong ba ka Ri Bhoi Dorbar ka dap shisha da ka mynsiem jong ka jingsngewkhia, ba bun ki paidbah sharum shaneng ki la ud bad ki la shah ktah na ka ne ka jinglip ka bording ilektrik bad kaba sngewphylla ka long ba ia ka bording ilektrik la tan na Ri Bhoi bad katba ki paidbah pat ki syrtok na ka jingthud palat ka bording ilektrik.
“Kiba bun ki paidbah ha kane ka juk stad mynta ki shaniah ha ka bording ilektrik bad ka jingbym biang ka bording ilektrik ka la ktah lut ia ki kam ki jam ki paidbah ha baroh ki liang” ong u Bah R.B Shadap, bad bynrap ruh ba lada ka long ha kane ka rukom ka la kham bha ba wat ka tnad MeECL ruh kam dei ban phah siew ia ka bai bording ilektrik, namar kumba la sakhi la bun ka por ba la lip ka bording bad ia kaba ki paidabh ki ioh ban pyndonkam” u la bynrap.
U la ong ruh halor kine ki jingeh ki paidbah, ka Ri Bhoi Dorbar shen kan sa pynpoi ia ka dorkhas ne ka shithi ban pynsngew sha ka sorkar lyngba u myntri ka tnad ba dei peit ia ka bording ilektri, ki MLA ka Ri Bhoi bad kumjuh ruh sha u Deputy Commissioner ka Ri Bhoi, na ka bynta ba kin shim khia ia kane ka kam, namar lada ka ka jingsam ia ka bording ilektrik kan long beit kumne kiba shah ktah ki dei ki paidbah ha kaba ngim lah ban len ba khlem ka bording ilektrik bun ki kam ki jam jong jong ki paidbah ki la shah ktah, u la pynpaw.
Shuh shuh, u la bynrap ruh da kaba ong, ba ka Ri Bhoi Dorbar ka khot ka wer naduh ki nongmihkhmat ka Ri Bhoi, ki seng bhalang, nongialam shnong, ki riew rangbah bad baroh ki paidbah ba kin ia ai ia ka jingkyrshan halor kane ka kam, namar lada kum ki paidbah ki sngap jar kiba jynjar ki dei ki paidbah bad kan nym don hi ruh ka jingshim khia ban weng ia kane ka jingeh ki paidbah kaba ki shah ktah na ka jingthud palat ka bording ilektrik ha Ri Bhoi District, u la bynrap.
