U Bah Pynshngaiñlang N Syiem Deputy CEM ka KHADC mynta ka sngi u la hiar sha District Council Nongpoh naka bynta ban jurip ïaka jingtreikam jong katei ka tnad kumba ka KHADC kala pynïar ïaki District Council Courts sha man la ki district bad kumjuh ruh ban tip ïaka jingduna ka rukom treikam ha katei ka tnad kaba don ha Nongpoh naka bynta ban ai ka jingshakri sha ki paidbah.
Haba kren sha ki lad pathai khubor naka liang u Bah PN Syiem Dy. CEM u la pynpaw ba ka jingwan jong u sha District Council, Nongpoh Branch ka long ban jurip ïa ïing kashari jong ka Council kumba ka KHADC kala pyniar ïaka tnad treikam bad buh ïaka District Council Courts ha man ki district naka bynta ban pynsuk bad pynjan ka jingtreikam sha ki paidbah bad ha katei ka jingjurip naka liang u Dy CEM u la lap ba ki nongtrei ki dang duna bad donkam ban dang pynkhlaiñ ïaki nongtrei ha katei ka tnad.
Hadien ka jingïakren bad ka Magistrate jong ka District Council Courts ha Nongpoh naka liang u CEM u la lap ba mynta ki don kumba 300 tylli ki mukotduna ha iingkashari jong ka KHADC ha Nongpoh bad la kumno kumno ki nongtrei la hap ban pynbun naduh ki Computer Assistant, LDA, Bench Assistant bad kiwei kiwei ki nongtrei bad ki jingdonkam.
U la ong ruh hadien ka jingpynkylla ïaka CrPC sha ka BNSS bad ka IPC sha ka BNS kiba bun ki dang long kulmar jingmut hynrei naka ki iingkashari jong ka District Council nangne shakhmat ki shim bad pyndonkam beit da kine ki kyndon aiñ kiba thymmai hadien bala pyntreikam ïaki haka jylla bad ka ri baroh kawei.
Shuh shuh u la ong ruh ha kaba ïadei bad ka tnad Forest la donkam ruh ban pynbha naduh ki building bad ïa kane yn sa rah sha ka tnad Forest ban leh ïa kaba donkam, khamtam ka jingpynbha ruh ïaka building ban pynthikna ïa u pud u sam bad ka jingker sawdong ïaka jaka jong ka District Council kumba kala don ruh ka jingsdang klun ïaki jaka jong ka District Council bad ïa katei ka baroh naka liang u Dy CEM u la dep ban lum jingkheiñ bad yn pyntreikam noh shen.
