Ki liengsuin iapom jong ka ri Israel ba kynthup ia ki F-15 bad F-35 hynnin ka sngi, ka 20 tarik u bnai Naitung ki la leit ban ther bom ia ka Hodeidah Port jong ka ri Yemen kaba la synshar donbor da ki lehnoh Houthi.
Katei ka jingleit ther bom ki liengsuin iapom ka Israel pyrshah ia katei ka ri Yemen, kadei hadien ba uwei u nong Israel u la khlad noh bad saw ngut kiwei pat ki la mynsaw jur ha ka nongbah Tel Aviv jong ka ri Israel na u bom ba la pynher da kitei ki lehnoh Houthi.
Katkum ka khubor kaba la ioh, la iathuh ba lai ngut ki nong Yemen ki la khlad noh ha katei ka jingther bom ki liengsuin iapom ka ri Israel bad kumba 87 ngut ki la mynsaw jur na ka jingklang jong ka ding kaba la i-shyrkhei.
U Myntri Rangbah jong ka ri Israel, u Benjamin Netanyahu, u la ong ba katei ka Hodeidah Port kadei ka jaka pynpoi tiar siat sha ki lehnoh Houthi da ka ri Iran. U la kyntu ia ki ri ka pyrthei ba kin ai jingkyrshan iaka Israel ban iakhun ia ki lehnoh kiba la bei tyngka da ka Iran ban pynthikna bad kin ia ka nong kaba khraw.
Ha kawei pat ka bynta, u heh shipai ki lehnoh Houthi, u Yahya Saree u la byrngem ban pynphai kylla ia katei ka jingther ka Israel ia ka Hodeidah Port bad bynrap ba ki shipai Houthi kin nym salia ban ther bom ia ki jaka ba kongsan jong ka Israel.
