U Bah Donald Rymbai u la kam ruh ba dei u trai jaka, haka jaka ba shongwai ka karkhana Resource Rubber Pvt Ltd kaba don ha ka shnong Mawsmai 11 mer u la shah kem noh haki pulit hynne ka step phyrngap hadien ba u trai katei ka karkhana u la ujor da ka ejahar pyrshah ïa u bah Donald Rymbai halor ka jingkynnoh ba dei ba u ba pynshit ïaka seng HYC ban leit jurip ïaki kot ki sla jong katei ka karkhana kaba la mih ruh ka thma ktien kaba jur bad jan poi sha ka jingktah kti.
Kum ban pynkynmaw, u Bah Donald Rymbai ryngkat ka kynhun HYC ha ka 22 tarik u Naitung 2024, u la leit ban jurip ia katei ka Karkhana da kaba pan ia ki iot ki sla bad ha katei ka jingleit jurip la kynnoh ruh ba la mih ka huri hura bad ka thma ktien hapdeng u trai ka karkhana sain jri bad ki nongialam ka HYC bad naka liang u Bah Donald Rymbai u la kam ruh ba katei ka dei ka jaka jong u bad u don ruh ki kot ki sla ban pynshisha hadien ba u la thied ïa katei ka jaka.
Naka liang u Bah B Jyrwa Addl SP ka Ri-Bhoi u la ong ba ka daw ba ki pulit kila kem ïa u Bah Donald ka dei hadien ka jingujor ejahar na u trai ka karkhana wat hadien ba ka Executive Magistrate ka la pynmih ka hukum ba um dei ban pynmih kano kano ka huri hura ha katei ka jaka hynrei u Bah Donald u la leit lang bad ka seng HYC ha katei ka sngi bala mih ruh ka thma ktien kaba jur hapdeng u trai karkhana bad ki dkhot HYC.
U la ïathuh ruh ba naka liang ka District Magistrate kala dep khot ruh ban bishar ïaki kot ki sla hynrei um shym la leit mih ban pynshisha ïaka jinglong trai ïa katei ka jaka bad wat hadien bala pynmih hukum u Bah Donald u dang leit sha katei ka jaka ban long ruh kum ka jingpynshit ïaki dkhot ka HYC bad dei hadien ka jingujor ejahar la kem noh ïa u bad ka jingtohkit mynta ka dang ïaid shakhmat.
