Ka seng HYC bad HITO Bhoirymbong Cricle kala pynpaw ka jingpyrshah jur halor ka jingtei resort u riew shimet harud ka wah Um-Inshi kaba don ha khappud ka shnong Lumsohpieng Bhoirymbong bad Lumdaitkhla Bhoirymbong bad naka liang kitei ki 2 tylli ki seng mynta ka sngi kila leit ruh ban ïakynduh ïa u BDO ka Bhoirymbong C&RD Block u Bah P Mukhim ban buddien kaei ba ka sorkar kala leh hadien ka jingujor naka seng bad ki paidbah.
Kum ban shu pynkynmaw ba naka liang ka seng HYC bad HITO kila leit ban jurip ïa katei ka jaka shna resort naduh ka 20 tarik Jymmang mynta u snem harud katei ka wah Um-Inshi bad kyrpad ruh ïa u trai katei ka resort ba u dei ban pynsangeh mardor namar ba u shna harud ka phudwah jong katei ka wah ba ktah ïaka mei mariang bad namar ka jingbym suidniew jong u trai jaka naka liang kitei ki nongïalam ka seng kila leit ruh ban buh da ka dorkhas sha u DC ka Ri-Bhoi bad kular ruh ban phah majistor ban tohkit ïa katei ka jaka hynrei haduh mynta ym don sati aba shimkhia bala pynlong iaka seng ban leit kynduh syndon ïa u BDO mynta ka sngi ban buddien ia katei ka kam.
Naka liang ka seng kila pynlong ruh ka jingjurip ha katei ka sngi haka jingialam u Samla Tyngshain Makri President HYC Bhoirymbong bad u Samla Samuel Hinge President HITO Bhoirymbong Circle haka jingsynran lang da u Rangbah Shnong ka Shnong Lumsohpieng, u Samla Hercules Suting President HYC Ri Bhoi bad kiwei kiwei
Haba kren sha ki lad pathai khubor, u Samla Tyngshaiñ Makri, President ka HYC Bhoirymbong bad u Samla Samuel Hinge ki la ïathuh ba kane ka jingleit ban kynduh ïa u BDO ka Bhoirymbong C&RD Block ka dei halor ban buddien halor ka jing ujor pyrshah ïaka jingtei kaba long pyrshah ïaki kyndon aiñ bad kaba lah ruh ban ktah ïa ka wah kaba don markhap bad katei ka jaka.
Kitei ki nongïalam kila pynpaw ruh ba naka liang u BDO u la kular ban shimkhia ïa katei ka kam bad kin pynlong ruh ka jingjurip haka 26 tarik mynta u bnai bad pynlong ruh ka jingthew jingwoh ban lap ïaka jingshisha la u trai jong katei ka jaka u la pynkheiñ ne em ïaki kyndon aiñ kumba la pynmih da ka iingbishar Supreme Court bad High Court.
Shuh shuh u la ong ruh ba naka liang jong ki kin pyrshah beit ïaka jingtei resort harud katei ka wah namar kane ka pynjot ïa katei ka wah kaba ki paidbah ki pyndonkam man ka sngi hakiba bun rukom naduh ka sum ka sleh ka sait ka khlieng.
