Nongpoh, Naitung 25: Ban ia tai sani halor ka jingeh ki paidbah nongshong shnong ha ka leit ka wan na ka jingshah iehnoh beiñ ka surok, u MLA ka Mawhati Constituency U Bah Charles Marngar u la lum syndon da ka jingialang ba kyrpang ia ki khlieh nongsynshar shnong na ka bynta ba ia kren ha kaba ia dei bad katei ka mad jong ka surok.
Kane ka surok kaba ki paidbah ki mat jingeh, ka dei ka surok kaba sdang na ka shnong Rtiang kaba pyniasoh shaduh ka shnong Nongsangu, ha ka jingjngai kaba 25 km, ba ki paidbah ki la syrtok ha ka leit ka wan bad khatam ki longkmie ba armet bad kiba pang ba shitom, kaba dei na ka jingsniew palat ka surok.
Ban ia kren halor kane ka jingeh ki paidbah, u MLA u la lum da ka jingialang ba kyrpang ha Dorbar Hall ka Shnong Rtiang ia baroh ki khlieh nongsynshar shnong na ki 15 tylli ki shnong ba hap ha ka Mawrong Road bad kynthup ruh ki 5 tylli ki shnong kiba hap ha ka thain Mawtari Thaiang, kiba ju pyndonkam ia kane ka surok.
Hadien kane ka jiingiakynduh lang ki khlieh nongsynshar shnong la pynlong ruh ia ka jingleit jurip ia katei ka Surok, ha ki bynta kiba la kham jot rathai bha, kaba sdang naduh ka Shnong Rtiang bad kaba kut haduh ka Shnong Nongsangu.
Ki 2 ngut ki rangbah Shnong ba kynthup ia U Bah Kluban Shadap Rangbah Shnong Syngku bad U Bah Spalton Laloo Rangbah Shnong ka Langsaw, ki la iathuh, ba naduh ba la ioh ia kane ka surok la palat 25 snem khlem don satia kano kano ka jingmaramot bad kane ka jingsniew ka surok ka la pynsyrtong ruh ia ki paidbah nongleit nongwan lyngba katei ka surok sniew.
Ki la pynpaw ruh ba kiba pang ba shitom, ki khynnah skul khamtam ki longkmie ba armet ki jynjar shisha ba leit ban wan na kane ka surok sniew bad lada ka sorkar kam lah ban pynurlong kumba ka la kular ban siang rong ia kane ka surok, ki nongialam shnong lem bad ki paidbah ryngkat ka jingdon lang u MLA kim banse ban shim noh da kawei pat ka la lad ka lynti kaba kham tyngeh.
U Bah Charles Marngar MLA/MDC Mawhati Constituency, u la pynpaw ba kum u MLA u la dep kyndduh ia u Myntri ka Tnat PWD Road ka Sorkar Jylla Bah Prestone Tynsong ha ka 6 Tarik Risaw 2023 ha ryngkat ka dorkhas bad na ka liang u Myntri ka tnad PWD u la iathuh, ba ia ka Surok Mawrong Road la dep ban pynrung ha ka Scheme PMGSY ha ka Phase -3, bad kaba sngewkhia pat haduh mynta ym pat iohi kita ki dak ki shin. U la pynpaw ruh ba ka PHC ka jaka ai jingsumar ka long kaba donkam bha bad la donkam ruh ban buh noh ha ka thain Mawrong.
Shuh shuh u Bah Charles u la la pynpaw ruh da kaba ong, ba wat la u don ha ka liang pyrhah, hynrei ki kam pynroi ki dei ban poi sha ki paidbah la ka long ha kino kino ki ka pynroi. U la ithuh ruh ba ha kane ka jingialang ki Khlieh Nongsynshar Shnong ka Mawrong Road Area lem bad ki San tylli ki Shnong na ka Thain Mawtari Thaiang ryngkat bad u ki la shim ia ka rai ban leit kynduh ia kynduh ia u Myntri ka Tnad PWD Road bad kumjuh ruh ia ka myntri ka tnad koit ka khiah na ka bynta kane ka surok bad ruh ba la donkam ban don noh ka PHC ha katei ka thain, u la bynrap.
