Hadien shisnem ba ka seng Federation of Khasi Jaintia and Garo People (FKJGP) kala phah da ka jingthoh sha u Myntri Rangbah ka Jylla u Conrad K Sangma bad dawa ruh ba u dei ban shimkhia ban kren bad ka sorkar pdeng ban pynkylla ïaka Draft Model Notification jong ka tnad Posts bad ban pynrung ruh ïaka ktien Khasi ne Garo haka eksam thungkam, hadien ba ka Ministry of Communication jong ka tnad Posts jong ka sorkar India kala rai ban thungkam kumba 445 ngut ki Gramin Dak Sevaks, Branch Post Master bad Assistant Branch Post Masters haki Post Office bapher bapher jong ka jylla Meghalaya.
Katei ka jingdawa jong ka seng kala urlong hadien ka Ministry of Communication kala pynmih da ka Office Memorandum bad pdiang ban kynthup ruh ïaka ktien Khasi bad Garo haka jingthungkam naka bynta kitei ki post haka tnad Post Office ba ki samla naka ri Khasi bad Garo ki lah ban jied da ka ktien lajong.
Kum ban shu pynpaw ba ka seng FKJGP haka shithi sha u Myntri Rangbah kala pynpaw ba ka tnad Post kala buh da ka ktien Hindi bad English naka bynta ka jingthungkam ïaki Gramin Dak Sevaks bad kum ka seng ka sngew ba kane kan pynduh noh ïaka lad ki samla trai muluk ban ioh ïa kane ka kam namar ba ki hap ban ïakhun bad kiwei pat kiba nabar jylla kiba lah ban ïakhun bad poi kham shakhmat khamtam haka ktien Hindi.
Naka liang ka seng kala kdew shai ruh ba haki por ba mynshuwa bun naki samla kiba la shah jied ban trei kum ki Gramin Dak Sevak, kiba la shah jied na Shabar ka jylla, kim ju kham treh ban trei haka jylla Meghalaya bad hadien ki jied pat ban pynkynriah noh sha la ki jong ki jylla bad ki jaka ba ki wan namar ki ai daw ïaka jingjngai, ka jingeh ka jaka bad ka jingeh haka ktien ka thylliej bad kane ka long tang kum ka jingkhanglad ïaki samla ka jylla ban trei ïa katei ka kam.
Kumta naka bynta ka jingplie lad ïaki samla kiba la nang la stad bad ki samla bym pat iohkam ka seng kala kyntu ïa u Myntri Rangbah ban kren sha ka sorkar pdeng ban pynkylla ïaka Draft Model Notification bad pynrung ruh ïaka ktien ba ngi kren haka jylla kum ka ktien trai nalor ka Hindi bad English, kumba ju leh ha kiwei pat ki jylla ka thaiñ Shatei Lam Mihngi naduh ka jylla Assam, Manipur bad Mizoram.
Naka liang u Myntri Rangbah ka jylla hadien ka ka jingdawa ka seng u la phah ruh da ka jingthoh sha u Ashwini Vaishnaw sha u myntri ka tnad Communications ka sorkar pdeng hadien ba u la pynpaw ïa kitei ki jingeh bad ka jingdonkam ban ailad da ki samla ka jylla ban trei ïa katei ka kam bad dei haka 7 tarik Naitung 2024 ka Ministry of Communication kala pynmih da ka Office Memorandum bad pdiang ban kynthup ruh ïaka ktien Khasi bad Garo haka jingthungkam naka bynta kitei ki post haka tnad Post Office ba ki samla naka ri Khasi bad Jaintia ki lah ban jied ïaka ktien Khasi, English bad Hindi katba ha ri lum Garo ki lah ban jied ïaka ktien English, Hindi bad Garo.
