Ki khubor hamsaia kila pur sted ba ka nongrwai bna nam ka pyrthei hi baroh kawei, ka Celine Dion lem bad ka Lady Gaga, ki la pynkhreh ban shimbynta ha ka sngi plie pyrda ia ka Paris Olympics 2024 bad kine ki arngut ki nongrwai bna nam kin shimbynta ban rwai ha katei ka sngi plie ia ka Olympics ka ban long ha ka 26 tarik u Naitung.
Ka Celine Dion, ka nongrwai kaba don ia ka sur kaba syiang ka dei ruh ka nongrwai kaba la ioh jingieid na kylleng ki ri ka pyrthei bad ki paid nongkyrshan jong ka, ki da thrang bha ban iohsngew biang ia ka sur jong ka lyngba ki jingrwai bna nam, ka Celine Dion ka dei ruh ka nongrwai kaba la shimbynta ban rwai ia ka jingrwai kaba paw bad sah jingkynmaw jong ka phlim Titanic ka jingrwai ‘My Heart Will Go On’.
Kaei kaba la pynsngewsih bad pynsngew tmang dohnud ia ki palat million ngut ki briew kiba ieid ia ka Celine Dion, ka long ba kane ka nongrwai bna nam ka pyrthei ka don mynta hapdeng ka jingshitom naduh u bnai Nohprah 2022.
Kane ka jingpang kaba shyrkhei, ka lah ban ktah lut naduh ka sur kren ne rwai jong ka Celine Dion bad ruh kan ktah ia ka met ka phad batai ka kaiphod ba la pynmih jong ka Celine bad lah ban sakhi lyngba ki social media, ba ka Celine ka la nang ring raikhoh bad iai tlot namar kane ka jingpang.
Hynrei, ka khubor hamsaia, ka la pynmih ba ka Celine Dion kaba dang don hapdeng ka jingshah sumar pang, kan mih pyrthei ha ka sngi plie pyrda ia ka Paris Olympics 2024 ha ryngkat bad ka nongrwai bna nam ka Lady Gaga.
