U Myntri Rangbah ka jylla, u Conrad K Sangma haka prokram CM-Connect mynta ka sngi u la pynsngap ia ka sur jong kawei ka longkmie na ka thain Ampati jong ka South West Garo Hills ha kaba u la mynjur mardor ban mang tyngka kumba T. 2 lak na ka bynta ban tei iaka jaka ap kali hadien ba u Myntri Rangbah u lah dep ban kular hi dalade ha ka jingleit jurip ka jong u sha ka shnong Monabari ha u snem 2018.
Kawei na ki riew tymmen ka la ieng ban pynpaw iala ka jong ka jingsngew ka jong ka ha katei ka sngi haka prokram CM-connect kaba la pynlong ha Ampati ha kaba ka la pynpaw iala ka jong ka jingdawa bad ka kular kaba u Myntri Rangbah u la dep ban kren bad kular ban mang tyngka.
Tang mar ia iohsngew ia katei ka jingkren katei ka riew tymmen, u Myntri Rangbah ryngkat bad ki bor pyniaid district ki la shem bad lap ba hooid ia katei ka bynta la dep ban mang tyngka, hynrei ym don pat kiba la leit sei ia katei ka pisa, kaba la hap ban pynphai biang ia ka pisa sha ka sorkar jylla ha u snem 2019.
Hynrei haba u Myntri Rangbah u la iohsngew ia kane ka bynta dalade, mardor u la shimkhia bad bthah ia ka kynhun ka jong u ba ki dei ban pynlait noh mardor ia ka pisa kaba T. 2 lak na ka bynta ban tei ia katei ka sem ap kali.
Katei ka longkmie tang mar ia iohsngew ia katei ka jingkren u Mynri Rangbah ba la mynjur noh hangto hangto ia katei ka jingkren ka jong ka, ka dap da ka mynsiem jong ka jingsngewkmen shikatdei ba katei ka jingangnud ka jong ka, ka la urlong bad ai ruh ia ka jingkhublei kaba kyrpang ïa u Conrad K Sangma halor katei ka jingshimkhia ka jong u bad ia ka pisa ruh halor kane ka bynta la aiti sha ka Riphingkona Village Organisation ba kan pyntreikam ia kane ka skhim.
Ki paidbah ka thain ha kane ka sngi, ki la shim kabu ruh ia kane ka rynsan da kaba pynpaw iala ki jong ki jingeh ki jongki ha kaba iadei bad ka jingpyntreikam ia ki skhim kiba pher bapher, ka jingsahteng ban pyndep ia ki skhim, ka jingbymbiang ka jong ka umbam umdih, ki surok bad kiwei kiwei de ki jingkular jong ka sorkar kiba dang sahteng.
Hadien ka jingioh sngew ia ka jingsngewkhia jong ki paidbah, u Myntri Rangbah ka jylla u la ong ba ka long da shisha kaba kongsan ba kum ka sorkar kadei ban ioh ia ka jingtip kaba mardor na ki paidbah bad pyntip ruh ba dei halor kata ka nongrim ba la ba pynmih iakane ka rynsan CM-Connect ban ailad ia ki paidbah ka jylla ba kin ioh ban pynsngew ia ki jingeh ki jongki khnang ba ka sorkar kan ioh ban pynbeit ia kita ki jingeh.
