Da ka mynsiem jong ka jingsngewsarong, ka skul Christian Higher Scondary School, Pahamsyiem mynta ka sngi ka la ioh ban pynkup burom kypang ia ki thei ialehkai U-17 kiba la jop ha ka State Level Subroto Cup 2024 bad kiban sa mih noh shen ban leit sha nongbah Delhi ban mihkhmat ia ka jylla sha ka 63rd Subroto Cup International Football Tournament 2024 ka ban sa long shen.
Ha kane ka sngi, la wan ban iadon ryngkat da u MLA ka Nongpoh, u Bah Mayralborn Syiem, u MDC ka Nongpoh, u Bah Balajied Rani, ki nongialam shnong ka Pahamsyiem nalor ki nonghikai bad pyniaid skul ka Christian Higher Scondary School, ki thei ialehkai bad ki kmie ki kpa ki jongki.
Haba ai jingkren ha kane ka sngi, u Bah Mayralborn Syiem u la pynpaw ia ka jingsngewsarong kaba khraw ba ha kane ka kynti, haduh lai tylli ki skul ka Ri Bhoi ki la ioh ia ka nam lahduh ha ka jylla bad ioh pat ban mihkhmat pat ia ka jylla sha katei ka 63rd Subroto Cup International Football Tournament 2024 ka ban sa long shen ha ka nongbah Delhi bad Bangalore.
U la ong ruh ba kamdei shisha ka kam kaba suk ba ki thei bad rang ialehkai ka Ri Bhoi kin ioh ia katei ka jingjop, lymda dei lyngba ka jingtrei shitom bad ka jinglen lade ka jongki, namar kumba long mynta, ka Ri Bhoi kam don satia ia ki jaka ialehkai kiba paka kumba don ha ka nongbah Shillong.
U Bah Mayralborn Syiem u la ai ia ka jingkitbok kitwriang ia ki thei ialehkai ka Christian Higher Scondary School bad ruh ia ki ar tylli kiwei pat ki skul kiba kynthup ia ka Mynken Christian Higher Secondary School ka ban mihkhmat ha ka kyrdan U-17 jong ki shynrang bad ka Nongjri Presbyterian Secondary School kaban mihkhmat ha ka kyrdan U-15 jong ki shynrang ba kin poi sha ka thong jong ka jingjop bad kan long ka burom kaba khraw ym tang ia kitei ki skul, hynrei ia ka District bad ka jylla hi baroh kawei.
Kum shi bynta ban ai mynsiem ia kitei ki thei ialehkai ka Christian Higher Scondary School, u Bah Mayralborn Syiem u la noh synniang ruh ia ka pisa kaba T. 1 lak bad kular ruh ba un sa iakren bad ki bor ba dei khmih jong ka Sports ha ka jylla ba kin shimkhia ban pynbiang ia ka bam ka dih jong kitei ki thei bad ki rang ialehkai jong ki skul ka jylla ha ka nongbah Delhi bad Bangalore bad ruh khamtam ban pynioh ia ki jaka sah kiba biang.
Ha kawei de ka bynta, u Bah Mayralborn Syiem u la aiti ruh ia ka Work Order kaba T. 3 lak sha ki nongialam skul jong ka Christian Higher Scondary School na ka bynta ban pyniar shuh shuh ia ka ingskul na ka bynta ka jingmyntoi jong ki khynnah pule.
