10 ngut ki dkhot jong ka seng Hynñiewtrep National Youth Front (HNYF) ki la shah kem ha ki pulit hadien ba ki la khanglad ïa ki kali na bar ka ylla ban leit sha Sohra bad sha Dawki.
Ïa kane la pyntip da u Symbud Myntri Rangbah ka Jylla uba dei peit ïa ka tnad kam pohïing (pulit) u Bah Prestone Tynsong.
Lah ban kdew ba hynne ka step, ki dkhot ka HNYF ki la pynsangeh bad phah biang ia baroh ki kali Tourist kiba wan na shabar ka jylla Meghalaya ha Umtyrngar East Khasi Hills, kaba dei ka lad ban leit sha Sohra bad Dawki.
Haba pynpaw ia ka jingsngewkhia ia ka jingleh jong ki khyndiat ngut ki dkhot seng HNYF, ha Umtangar East Khasi Hills, u Bah Prestone u la ong “kane kam dei ka rukom ban khanglad ia ki nongwan jngohkai pyrthei ban leit sha Sohra ne sha Pynursla. Ki dei tang ki nongjngohkai pyrthei kiba kwah ban mad ia ka jingitynnad jong ka jylla Meghalaya”.
“Ka long kaba sngewsih shibun ba kum kane ka jingjia ka la jia mynta ka sngi. Ngim shym la tip bad ngim shym la khmih lynti ba tang khyndiat ngut ki kynhun ki briew kin leh kumta. Ka ain ka la shim ia la ka jong ka lynti. Ngim shah ia kum kine kiei kiei ban jia biang” la ong u Bah Prestone.
U bah Prestone u la ong ba ka jingkhang jong ka Secretariat ka plie beit na ka bynta baroh kiba don ki jingeh ba kin wan shaka miej jingiakren kaba dei ka nongrim jong ka synshar paidbah.
