Ki nongialam ka Hynñiewtrep Youth Council (HYC), Sengkmie mynta ka sngi, ka la ban jur ba ki bor pyniaid district ka East Khasi Hills District ki dei ban shimkhia mardor ban weng noh ia kumba 80-90 tylli ki longing kiba sah beaiñ ha ka jaka kaba don kumba 24 hajar square feet ha Lum Survey, Shillong.
Ia kane la iathuh da u samla Roykupar Synrem, President ka HYC, haba kren bad ki Nongthoh Khubor hadien ka jingialang ba la khot da ka Deputy Commissioner ka East Khasi Hills District ka Kong RM Kurbah hadien ba dang shen ha u bnai Jymmang ka HYC ka la leit kyndang Syndet ia katei ka jaka ba la sah beaiñ da ki briew bym lah ithuh ia kaba la kynnoh ruh ba ki jingsniew kiba bun ki la mih na katei ka jaka ha u Lum Survey khamtam ka jingjyllei jong ka jingshalan drug.
La iathuh ruh, ba ka HYC ka la byrngem ban shim da ka sienjam ba tyngeh lada ki bor sorkar jylla kim leh eiei pyrshah ia kitei ki briew kiba sah beaiñ ha u Lum Survey hapoh ka 19 tarik Nailar.
U Samla Synrem u la pyntip, ba ki nongialam ka seng dang shen ki la lap ba kine kiba shong beaiñ ha katei ka jaka ki ju donkti ban pynjaboh ne pynsniew ia ka imlang sahlang namar ka jingkynrei ka jingshalan drug, da kaba bynrap ba ki bor pulit ka jylla ki la pynngat kyndon aiñ pynban ia 3 ngut ki dkhot kynthup ia u President halor ka jingleit kyndang da ka seng dang shen ha katei ka jaka.
