Ka bor District ka East Khasi Hills mynta ka sngi ka ka bthah ia ki pulit ban pahara ha Lum Survey ban nym don kano kano ka jingthut ha ka sngi ba shong bishar ha Iingkashari ka ban long ha ka 19 tarik u Nailar.
Ki bor District ka East Khasi Hills ki la shim iakane rai hadien ba la dep ka jingialang ba la pyniaid da ka Deputy Commissioner R.M Kurbah, bad kiba la ia shim bynta da u SP ka District, u CEO ka Shillong Cantonment bad u President bad Secretary ka seng Hynniewtrep Youth Council (HYC).
Haba iadei bad ka kaiphod jong ka jingwan jurip ba pynlong ha ka 8 tarik Jymmang, ka Deputy Commissioner ka la pyntip ba u Defence Estate Officer u la pyntip ba nalor ki lai ngut kiba la ujor sha iing kashari, ki dang don ruh kiwei kiba sah beaiñ ha Lum Survey.
Ka DC ka la pyntip ruh ba ki don palat kumba 80 lane 90 tylli ei ei ki iing ha Lum Survey kat kum ka survey ba la dep bala pynlong da u DEO. Kine ki briew ki la shong la sah beaiñ hakane ka jaka khlem ka jingbit.
