Ka shikol kaba la thep da u Wadajied Kynsai Ryngkhlem, uba la thep ha ka minit ba 7 jong ka kylla step ka jingiakhun, ka la biang pura ia ka Shillong Lajong Football Club ba kan pynliem noh ia ka Tribhuvan Army Footbal Team, ka kynhun ialahkai na Nepal bad kaba la wan ban iashimbynta ha ka Durand Cup 2024, ha kaba sdang ka jingialehkai ki khynhun kiba don ha ka Group-E.
Ka SLFC bad ka Tribhuvan Army FT, ki dei ki kynhun kiba don ha ka Group-E ha ka Durand Cup bad ki ban lehkai na madan JN Stadium Polo, ha kaba nalor kitei ki kynhun, la don sa artylli ki kynhun kiba ialehkai ha ka ISL kiba kynthup ia ka FC Goa bad Hederabad FC ki kynhun kiba donlang ha ka ka Group-E.
Khyndiat haba phai ha ka jingiakhun kaba mynta ka sngi ha madan JN Stadium, da shisha ka la long ka jingiakhun kaba itynnad bad kaba la pynhun eh ia ki khmat jong ki nongpeitkai bad khamtam eh ia ki nongkyrshan ka Shillong Lajong FC.
Naduh ka kylla step haduh ka kylla miet, ka jingiakhun ka long long shisha kaba itynnad bad kaba iakhaid bha, ha kaba ka jingioh ia ki kabu ban thep kol ka long kaba mar iaryngkat.
