Hadien ka jingud jingnam jong kiba bun ki paidbah naka thaiñ Western Ri-Bhoi halor ka jingbym treikam bad bym don nongtrei ka Patharkhmah Civil Sub Division kaba la shu khang tala beit da ki taiew bad ki bnai, ka seng Ri-Bhoi People’s Council (RBPC) sengkmie mynta ka sngi kala leit ban jurip ïa katei ka ophis sorkar ban lap ïaka jingshisha.
Ha katei ka jingleit jurip hapoh ka jingïalam u Samla Jayson Lennox Nongrum President lem bad ki dkhot naka liang ka seng kala poi ha ophis jong u SDO haka por 12 baje eiei mynsngi hynrei la lap ba ïa katei ka ophis la shu khang tala naduh ka khyrdop ba nabar haduh ki kamra treikam ba shapoh bad lap ruh ba katei ka ophis kala shu jaw um bad mih ruh ka jingsma.
Kum ban shu kdew hangne ba ïa ka Patharkhmah Civil Sub Division la kyntiew kyrdan naka Patharkhmah Administrative Unit hadien kumba 33 snem bala wan ruh ban plie pyrda da u Myntri Rangbah ka jylla u Conrad K Sangma ha u bnai Naiwieng jong u snem 2022 da ka jingangnud ban ai ka jingshakri bad pynsuk ïaki paidbah, bad ïaka ophis jong u SDO mynta la shu shong ha ka ophis ka tnad PHE namar haduh mynta ym pat sdang I dak eiei ban shna ïaka ophis ba pura wat hadien ba ka jaka la dep ban ai sngewbha naduh u snem 1998 ha Patharkhmah.
Haba kren sha ki lad pathai khubor naka liang u Bah Jayson Lennox Nongrum u la pynpaw ba ka jingwan katei ka Civil Sub Division ka long ka jingkyrkhu kaba khraw ïaki paidbah ban pynjan ka jingshakri jong ka sorkar, namar baroh shi katta tang naka bynta ki kam barit ki paidbah ki hap ban wan shaduh Nongpoh, hynrei kumba long mynta kam lah satia ban ai ka jingshakri ïaki paidbah nongshong shnong katei ka thaiñ ban ai ka jingshakri kumba la khmih lynti bad bala kren shai ruh da u Myntri Rangbah haka por ba plie ïa katei ka Civil Sub Division.
Ka seng kala ong ruh ba lada katei ka ophis ba heh ha katei ka thaiñ kam lah ban shakri bad shu khang tala beit kan bha ïaka seng ban khang tala syndon namar kam don jingmut ban shu don tang ka shynrong khlem ka jabieng, namar ka jingkren u Conrad Sangma haka sngi ba plie ïa katei ka ophis treikam ban pynjan ïaki tnad sorkar sha ki paidbah kam long katkum ka jingtreikam ba mynta katei ka Civil Sub Division.
U la ong ruh ba ka kum ka seng ka sngewkhia halor ka jingbym pat I dak eiei ban sdang shna noh ïaka ophis ba pura jong ka Civil Sub Division wat haba ka shnong kala dep ban ai ei ïaka jaka da ka jingangnud ban pynsuk ïaki paidbah ha katei ka thaiñ ban ioh ka jingshakri naka sorkar.
Kum ka seng kala dawa ruh ba dei ban thung noh da u SDO ba pura ha Patharkhmah Civil Sub Division u ban kitkhia ïaka kam bad u ban don beit ha katei ka jaka bad ka ophis treikam bad kumjuh ruh ki nongtrei kiba thikna ban pynsuk ïaki paidbah kiba leit donkam ha katei ka ophis.
