Ha kane ka Durand Cup kaba mynta u snem 2024, la iohi bad sakhi ba ki samla Khasi ki la lah shisha ban tyngshain bad ban pynpaw ialade ba ki dei kiba tbit ha ka kam ialehkai phutbol.
Kawei kaba la sakhi ia ka jingtbit ki samla Khasi bad kiba la long iaryngkat bor ban iakhun bad kiwei pat ki rangialehkai na kiwei ki ri, ka dei ha ka jingiakhun kaba la long hapdeng ka Shillong Laong Footbal Club pyrshah ia ka Tribhuvan Army Football Team, ka kynhun ialehkai ki shipai na ri Nepal, ha kaba lyngba katei ka jingiakhun, la iohi ba ki samla Khasi ki kham tbit haba nujor bad kitei ki rangialehkai na Nepal, kampher watla ki kham duna ha ka rynieng.
Haba phai ia ki rangialehkai ba ka Shillong Lajong ka la pynialehkai ha JN Stadium Polo, ki la don kumba 8 ngut ki samla Khasi, kata kiba kynthup naduh u Hardy Cliff Nongbri, uba dei u kapten ka Shillong Lajong, nangta u Ronney Wilson Kharbudon, u Kynsailang Khongsit, Everbrightson Mylliempdah, u Phrangki Buram, u Wadajied Kynsai Ryngkhlem, u Kenstar Kharshnong, u Hamedamanbha Wahlang, lait nangta ki rangialehkai bym dei Khasi ki kynthup ia Manas Dubey, uba dei u rangapkol, u Aman Ahlawat bad u Marcos Rudwere Genar Silva, uba dei u rangialehkai na Brazil.
Kat haduh mynta, ki don kiwei pat ki samla Khasi kiba lehkai na kiwei pat ki Klob ha kane ka Durand Cup, ki kynthup ia u Aiban Dohling, uba ialehkai na ka Kerela Blaster FC, u Sameul Lyngdoh Kynshi, uba lehkai na Punjab FC, u Redeem Tlang uba lehkai na ka North East United FC, u Wanboklang Lyngkhoi uba lehkai na ka Bodoland FC bad kumjuh u Jefferson Nongrud, uba la mihkhmat na ka kynhun ialehkai ki shipai Assam Rifles.
