Ka kynhun ki samla na ka jylla kiba ia khun ia ka MCS (Prelims) examination bad ruh kito kiba la paw kyrteng ha ka original lists jong ki 580 ngut kiba ia khun ia kane ka examination MSC, ki la kynnoh ba ka khun jong u Secretary ka MPSC ka dei kawei napdeng ka kyrtong kaba la pynpaw ia ka jingpyrshah ia ka jingdawa ka Khasi Students Union, ba ka KSU ka la dawa ba dei ban pynpaw ia baroh ki marks jong ki samla kiba iakhun ia kane ka MCS examination.
Ha ka shithi ba la phah sha ki nongialam ka KSU, kane ka kynhun ki samla ba ia khun ia ka MSC bad kiba ym kwah ban pynpaw kyrteng, ki la ong, “ Hadien ba la iohi ia ki khubor ba ka KSU ka iakhun pyrshah ia ki kynrum ki kynram ba la mih na ka MCS examination hapoh ka MPSC, kane ka kynhun ki samla ki la ai ka jingiaroh kaba khraw ia kane ka mat ba la shim da ka KSU halor ka jingkynnoh ba ka don ka jingbym biang ha kaba ia dei bad ka MCS examination.
Ki la pypaw ruh sha ka KSU ba ha ka jingpynlait ia ka List kaba ar da ka MPSC hadien ba la lap ba ka don ka jingbakla kumba ka lam da ka MPSC, ka don ka kyrtong kaba dei ruh ka khun jong u Secretary ka MPSC bad kaba pyrshah ruh ia ka jingdawa ka KSU ban pynpaw paidbah ia ki Marks ba la ioh da kito ki kyrtong ba ia khun ha ka MCS Prelims kaba la pynlong ha u snem ba la dep. Ki la iathuh ruh ba ka dei ruh kawei napdeng ki 6 ngut ki kyrtong kiba la ai ia ka muhor ha ka shithi na ka bynta ban pyrshah ia ka jingdawa ka KSU ban pynpaw paidbah ia ki marks jong ki kyrtong.
Kane ka kynhun ki samla ba iakhun ia kane ka MSC examination, ki la pynpaw, “ ba ki kwah ban pyntip sha ka KSU ba ka khun jong u Secretary ka MPSC, ka dei ruh kaba la shah jied ha ka Post LDA ba la pynlong da ka MPSC, ha kaba ia ka result la dep ban pynbna ha u bnai Naitung bad kane ka paw shai ba ka don ka jingbym khuid ha ka liang ka jingthungkam thungjam hapoh ka MPSC.
Kitei ki kynhun haka shithi ba la phah sha ka KSU, ki la kyrpad jur ruh ia ka KSU ba kin shim khia halor kane ka kam bad ruh ban pynthikna ba ka jingthungkam ha MCS ha MPSC ka dei ban long kaba khuid kaba suba naduh mynta bad ha ka pateng ban sa wan, ki kyrmen ruh ba ka KSU kan dang bteng ban ia khun pyrshah bad ruh ban pynkut ia baroh ki kam leh thok. Ki la pynpaw shuh shuh ba ka jingiakhun pyrshah ka KSU ia kane ka kam bym khuid ha ka thungkam thungjam ha MPSC ka ai jingkyrmen ia ki, kiba ym don satia kata ka jingiadei bad kino kino kiba trei ha MPSC bad kiba thrang pat ban shakri na ka bynta ka imlang ka sahlang kum kita ki nongtrei sorkar ba la tip ki Civil Servant.
Shuh shuh, ki la kyrpad jur ruh ia ka KSU ba kin shim khia ia katei ka shithi ba ki la phah ba ka dei ban long kaba don Nongrim bad ruh lyngba ka jingiarap ka KSU kin dang lah shuh shuh ban dang pynpaw ia kiwei kiwei ki kam leh rieh hapoh ka MPSC.
