Haba kut noh ka lympung ialehkai phutbol kaba la pynlong da ka Mawroh Sports Socio & Cultural Club (MSS&CC) ha madan NSCA Pahamsyiem, ka jingiakhun phainal ka la long hapdeng ka Lumkya Sports Club pyrshah ia ka Nangkyrsiew Thiah Sports Club bad ha katei ka jingiakhun phainal, ka Lumkya SC ka la lah ban pynliem noh ia ka Nangkyrsiew Thiah Sports Club da 2-1.
Ha katei ka sngi ba la pynkut ia katei ka lympung ialehkai phutbol, la sakhi da ka jingdon u Bah Mayralborn Syiem, MLA ka Nongpoh kum u kongsan, nangta u Bah Balajied Rani, MDC Nongpoh, u Bah Jedwin Lyngdoh, Rangbah Shnong Pahamsyiem, Samla Carmelo Rymbai, President ka MSS&CC lem bad kiwei.
Ka jingiakhun ha katei ka sngi, ka la dei ka jingiakhun kaba iakhaid eh, namar kitei ki kynhun kiba la poi sha ka thup jong phainal, ki don ia ki rangialehkai ba kynsai bad kiba tbit ha ka jingialehkai phutbol.
Ha ka jingiakhun naduh ka kylla step bad kylla miet, ka dei ka jingiakhun kaba iakhaid, hynrei ha ka jingiakhun, ki rangialehkai ka Lumkya SC, ki la lah ban ialehkai khambha bad kiba la ioh ia ka kabu ban thep 2 kol, katba ka liang ka Nangkyrsiew Thiah SC ka la ioh ban thep tang shikol bad kaba la pynlong ia ka Lumkya SC ba kan pynliem da 2-1.
Ka Lumkya SC kaba la ioh ban rah ia ka namladuh, ka la khur ia ka song pisa kaba T. 50 hajar lem bad ki Trophy, katba ka Nangkyrsiew Thiah SC kaba la shah rem noh ha katei ka phainal, ka la khur ia ka song pisa kaba T. 25 hajar lem bad ki trophy. Nalorkata ki nongpyniaid jong katei ka lympung ialehkai, ki la lah ruh ban sam ia ki khusnam shimet, kiba kiba kynthup naduh u rangialehkai ba tbid tam, u rangapkol bad u rangialehkai ban ioh ban thep bun kol tam.
