Ki paidbah Nongshong Shnong ka Shnong Nongspung B ba hap ha Jirang Constituency ha RI Bhoi District ki la pynpaw ia ka jingsngewkhia kaba jur halor ka jingshah ktah ki paidbah na ka jingshlei um, kaba ki la shah ktah na ka jingtih khyndew ki bar jylla.
Kane ka jingjia ka la jia hynnin ka sngi u Baar jong ka taiew, kaba dei hadien ka jingther u lapbah lapsan haduh ba la pynshlei um ia ka surok bad bun ki ing ki sem ki la shah ktah.
Na kane ka jingshlei um ki la don ki ing ki sem kiba la shah ktah jur ba kynthup ia ka ing jong ka Kong Lijenta Sungoh, Kerning Sunoh, Premika Sungoh, Wompher Dhar bad Manar Suting.
Na ka liang kitei ki longing, ki la pynpaw ia ka jingbitar kaba jur, kaba dei na ka daw ka jingshah ktah ha ka jingshlei ba ka um ka la rung shaduh ki ing ki sem bad bun ki jingdon jingem ki la julor bad kaba la wan rah ka jingduhnong kaba khraw ia ki kum ka ing ka sem.
Haba kren halor kane ka jingshlei um, naduh kitei ki longing bad ki paidbah nongshong shnong ki la kynnoh ba kum kane ka jingshlei um kam ju don baroh shi katta ha katei ka shnong, hynrei naduh ba la don ka jingtih khyndew da ki bar jylla ka la wan rah ka jingshlei um na ka daw ba ka khyndew kaba ki tih ka la khanglad ia ki nala ba la wan rah ka jingshlei um sha ka surok bad ka ktah ruh ia kiba bun ki ing ki sem.
Kum ki nongshong shnong ki la kyntu ia ki bor ba dei peit ka sorkar ba kin shim khia ban tehlakam ia katei ka jingwan tih khyndew ki bar jylla, kiba shalan pat ia ka khyndew sha Assam bad lada kum kane ka jingtih khyndew kan dang bteng ki paidbah kin dang hap ban mad ia ka jingshlei um tang shu wan u lapbah kumba la jia ha kane ka jingther u lapbah.
Shuh shuh, ki riew rangbah ki la kyntu ruh ia ka sorkar ba kan phaikhmat ruh sha kito ki longing kiba la ngat ha katei ka apot ka jingshlei um, ba ki jingdon jingem jong ki, ki la shah pynjulor na ka jingshlei jong ka um.
