Ka Sheikh Hasina, Myntri Rangbah jong ka ri Bangladesh kaba la iehnoh kam syndet bad hap ban phet krad noh ialade bad wan rieh tngen sha India hadien ba ka jingjur jong ka jingiakhih ki paidbah kiba la kynnoh ba ka la synshar donbor pyrshah ia ki liang pyrshah bad ki paidbah kiba dawa ia ka hok.
Katei a Myntri Rangbah barim jong ka ri Bangladesh, ka la wan poi ha ka kad liengsuin Hindon Airforce Base ha Ghaziabad lyngba ka liengsuin C-130 jong ki shipai ryngkat bad ka para ka jongka, ka Sheikh Rehana hynnin ka janmiet. Ha katei ka kad liengsuin, ka Sheikh Hasina ka la kynduh ruh ia u National Security Advisor ka India, u Ajit Doval.
Katkum ka khubor kaba la ioh lum, la ong ruh ba katei ka Myntri Rangbah barim ka ri Bangladesh, ka lah ruh ban ia kynduh ia ka khun ka jongka, ka Saima Wazed, kaba trei kum ka Regional Director jong ka World Health Organisation, South East Asia ha ka nongbah Delhi.
Ki tyllong khubor ki la iathuh ba ka Sheikh Hasina ka don ia ka jingthmu ban leit pan jaka sah ‘Political Asylum’ sha ka nongbah London jong ka ri United Kingdom hadien ba ka jingsah ba shipor ka jongka ha ka nongbah New Delhi.
Kum ban shu kdew, ka ri Bangladesh ka don hapdeng ka jingia um snam kaba jur na ka jingiakhih paidbah halor ka bhah thungkam thungkam ha kaba palat 280 ngut ki briew ki la shah pyniap bad ki hajar ngut ki la mynsaw naduh ba sdang jong ka jingiakhih ha u bnai Naitung, 2024.
