Ka President jong ka Ri India, ka Droupadi Murmu mynta ka sngi, ka la shah pynkup da ka khusnam paidbah kaba heh duh jong ka ri Fiji ia kaba la tip kum ka ‘Companion of the Order of Fiji’. Ia katei ka khusnam la pynkup burom ia ka Droupadi Murmu da u Ratu Wiliame Maivalili Katonivere, uba dei u President jong ka ri Fiji.
Ka Droupadi Murmu kaba la leit ban iuh kjat kumba ar sngi sha katei ka ri Fiji, ka pynpaw ba kane ka jingpynkup burom ka pynpaw ia ka jingiadei kaba iajan hadpeng ka jinglong paralok ka ri India bad Fiji. Kane kan dei ka sien kaba nyngkong eh ba ka khlieh duh jong ka ri India ka la poi ban iuh kjat ha katei ka ri.
Na ka liang u Narendra Modi, Myntri Rangbah ka ri, u la pynpaw ia ka jinsngewsarong kaba khraw ia baroh ki paidbah nongshong shnong ka ri India halor katei ka jingshah pynkup burom kaba kyrpang jong ka Droupadi Murmu kaba u la ong ruh, ka long kum shi bynta ban ithuh ia ka jingiadei kaba iajan hapdeng ka ri India bad Fiji naduh ki snem kiba mynshwa.
