U Myntri ka sorkar Assam, u Ashok Singhal u la kam ba ka jingshlei um jong ka sorbah Guwahati hynnin ka sngi kadei ka umslap kaba tuid na ka jylla Meghalaya, bad ong ba kamdei satia ka um kaba mih na ka sor Guwahati.
“Kane kamdei ka um Guwahati, kadei ka um Meghalaya. Ka um Guwahati ka iong, hynrei ka um na Meghalaya ka saw” la ong utei u Ashok Singhal hadien ka jingshlei ka umsaw ha ki bynta ba pher bapher jong ka sorbah Guwahati. Utei u myntri ka sorkar Assam, u la pynshai ruh ba ka umsaw kaba shlei ha ka sorbah Guwahati kadei ba la tuid na ki khyndew saw jong ka Meghalaya.
Katei ka jingshlei um kaba shyrkhei ha ka sorbah Guwahati hynnin ka sngi, ka la wanrah ruh ia ka dheng kali kaba shyrkhei haba bun na ki paidbah nongleit nongwan ki la sahkut ha ki surok tad haduh ka shiteng synnia bad bun na ki ing ki sem, ki dukan bad bad wat ki kali motor ruh ki la shah tap lut ha ka um.
