U Myntri rangbah ka jylla u Conrad K. Sangma mynta ka sngi u la leit ban ia shim bynta kum u kongsan ha ka jingialang ba la long ha Parish Hall Nongpoh, kaba dei shi bynta ka thong jong ka CM Farm+. Ka jingthmu kane ka CM Farm+ ka long ban kyrshan radbah ia ki nongrep, ki kynhun nongrep bad ruh ban kyntiew ia ka ioh kam ka ioh jam jong ki khun samla kiba pyrshang ban ieng ha la ki jong ki kjat na ka bynta ba kyrshan ia lade bad ia ka ing ka sem.
Ha kane ka jingialang la sakhi lang ruh da ka jingdon lang ka Dr. Ampareen Lyngdoh, ka myntri ka tnad ka koit ka khiah, u MLA ka Nongpoh, u Bah Mayral Born Syiem, u Deputy Commissioner ka Ri Bhoi, u Abhilash Baranwal, ki ophisar na ki tnad treikam sorkar bapher bapher bad kynthup ki nongrep na kylleng ka them Ri Bhoi.
Ha kane ka jingialang u Myntri rangbah ka jylla, u la sam paidbah ruh ia symbai dieng jong u jingthung ba la tip kum u Large Cardamom sha ki nongrep ka Ri Bhoi.
Kumba la pynpaw ka thong jong ka CM Farm+ ka long ban thaw dur na ka bynta ban kyntiew bad pynheh ia ki jaid jingthung kiba don dor ha iew ha hat, ki kam kiba ioh jingmyntoi na ka bynta ban iada ia ka mei mariang bad ban iarap ruh ia ki nongrep ban ioh ia ki lad jingiarap naduh ki tiar ki tiar bad ki symbai jong ki jaid jingthung ba don dor kum u u sohmarit u sohtrun, cinnamon, large cardamom, cashew, kophi, cpcpa bad kiwei kiwei ki jaid jingthung ba don dor ha iew ha hat.
U Myntri rangbah ka jylla, u Conrad K. Sangma u la ban khia halor kane ka thong ka CM farm+ ba ka sorkar jylla ka wan rah ban kyntiew ia ka ioh ka kot ki nongrep, ban pynkhlain ia ka jingpynmih ia ki mar rep ba don dor, ban wan rah ia ka iew ka hat kaba ai jingmyntoi ia ki nongrep haba ki wan ban die sha ki iew ki hat ia ki mar rep jong ki. Ha ki 6 snem ba la leit noh, ki prokram bapher bapher ba la pyntreikam na ka bynta ki paidbah khamtam ki longing kba la kot haduh 150,000 ki la ioh jingmyntoi na kitei ki prokram bapher bapher.
U la ong ruh ba kane ka CM Farm+, ka dei ka thong jong ka sorkar jylla ban iakhun pyrshah ia ki jingeh ki nongrep khamtam ban pynthikna ba kin ioh ia ki symbai bad ruh ban pyntreikam janai na ka bynta ki jingmyntoi ki nongrep. Kane ka prokram kan iarap haduh 10,000 hectares ki jaka bad ka sorkar kan pynlut ruh haduh 300 klur ban pyntreikam na kawei ka shnong sha kawei ka shnong na ka bynta pyniar ia ka jingtreikam bad ruh ban ioh jingmyntoi ki paidbah hapoh ka jylla.
U la byrnap ruh ba kane ka CM Farm+ kan ai mynsiem ruh ban wan rah ia ki jaid jingthung ba long thymmai ba ki nongrep kin rep sha ki jaka rep jongki bad ruh ban kyntiew ia ka ioh ka kot bad ka jingpynmih ki nongrep ia ki mar rep jongki, kiba lah ban ai jingmyntoi ne kyrshan ia ki kum ki nongrep lyngba ka kam rep ka kam riang.
