Ka Vinesh Phogat, kaba dei ka thei ialympat ka ri India bad kaba la mihkhmat ia ka ri ha ka Paris Olympic Games 2024, ka la shah weng noh ha ki khyndiat kynta shwa ba kan iakhun phainal ha ka jingiakhun Freestyle Wrestling jong kiba hapoh ka 50kg, kata ka dei hadien ba la lap ia ka ba ka la tam 100 grams na ka jingkhia kaba dei ban long 50kg.
Haba iadei bad ka jingshah weng noh ka Vinesh Phogat ban iakhun ia ka phainal, na ka liang ki briew ka Indian Olympic Association (IOA), ki la pyrshang ban iakren bad ki nongpyniaid ka Paris Olympic, hynrei ka jingiakren kam poi shuh shano shano, namar ba la lyngkot eh ka por.
Na ka liang u Narendra Modi, Myntri Rangbah ka ri, u la pynpaw ia ka jingsngew bynniaw halor katei ka jingjia bad uba la ai ruh ka jingiaroh ia ka Vinesh Phogat, nalorkata u la kren ruh sha u President ka IOA na bynta ba ki dei ban leh eiei halor katei bad ruh bad thaw ia ki lad ki lynti ban ujor katkum ki kyndon ain.
Lah ruh ban kdew hangne, ba ka Vinesh Phogat, ka dei ka kynthei ban nyngkong na India ban poi sha ka phainal ha ka jingialehkai ialympat ha ki Olympic, hynrei katei jingshah weng noh tand namar ba ka kiew ka jingkhia kaba long tang 100 grams, ka la pynkyndit eh ia ki nongshong shnong ha ka ri hi baroh kawei.
Ka Vinesh Phogat, ka la don ha ka lynti ban khur ia ka Takma Ksiar ne Rupa ha ka Olympic Games 2024, ha kaba ka la lah ban pynliem noh ia ka Yui Susaki nongialympat na ri Japan bad kaba la dei ruh ka nongjop ba saw sien kynthih ha ki jingiakhun ha ka Olympic.
