U Myntri Rangbah ka Haryana, u Nayab Saini, ha ka sngi palei ka 8 tarik Nailar u la pynbna ba ka sorkar jylla, kan pdiang ïaka nongïakhun Wrestling ka Vinesh Phogat, ha kajuh ka rukom kum ka nongjop takma rupa ha ka Olympic.
U Saini, lyngba ka rynsan X, u la ong ba ka sorkar kan ai ia ka Phogat ia kajuh ka khusnam bad ki jingdonkam kumba ai ia u ne ka nongjop takma ha ka Olympic.
“Ka la rung sha ka phainal, hynrei kam shym la lah ban ïalehkai namar ki katto katne ki daw. Ka dang long ka nongjop na ka bynta jong ngi,” la ong u myntri rangbah ka Haryana.
Ka Phogat ka la pynbna ba kan shongthait noh na ka jingialehkai wrestling shisngi hadien ba ka la shah pynduh noh ha ka jingialehkai phainal jong ka Paris Olympics ha ka kyrdan 50kg. Katei ka nongïalehkai ba tbit ka la shah weng noh hadien ba kala tam 100-gram naka 50 kg shuwa ka jingïakhun phainal kaba la pynlong ïa katei ka thei ïalehkai ban iam kthang namar kam ioh ban pynurlong ïaka jingthmu bad jingtrei shitom jong ka.
