Ki nongialam ka KSU kiba la leit tur biang sha ka ophis ka MPSC hadien ka jingbym hun ia ka jubab halor ka jingdawa pynbna paidbah ia ki marksheet jong ki nongialeh examination jong ka Post MCS, mynta ka sngi ki nongialam ki la thang ruh ia ki tynshop nongmuna jong ka MPSC bad rai ruh ban shong beit hakhmat ka ophis ka MPSC tad haduh ban da ioh ia ka jubab kaba paka na ki bor ka MPSC.
Ki nongialam ka KSU ki la dawa hiar shuki ruh ia u Chairman bad Secretary ka MPSC bad kynnoh ruh ba kane ka ophis ka dei kata ka shlem jong ki briew ba pyndonkam bakla ia la ka bor da kaba thungkam da ka rukom bym khuid.
Haba kren shaki lad pathai khubor, u president ka KSU u Samla Lambokstarwell Marngar ula ong baka seng kan shong beit ha phyllaw ka MPSC tad haduh ba ki bor pyniaid ka Commission ki shimkhia ban pyllait paidbah iaki Marks Sheet jong ki samla ba iakhun eksamin MCS.
U samla Lambokstarwell ula ong ba kine ki kynrum kynram hapoh ka MPSC kim dei shuh kiba jia tang shisien hynrei kidei kiba la jia naduh ki por mynshwa.
“Ka KSU ka kwah ba ka rukom thungkam la kadei naka MPSC ne ki DSC kidei ban long kaba khuid ba suba hynrei kumba iohi mynta ka MPSC ka kylla kum ka jaka lum khajna jongno re jongno” la ong u Bah Lambokstarwell.
U President ka KSU ula ong ba lada la rukom thungkam ka long kaba khuid, ka MPSC ruh kam dei ban tieng ban sei ne pynbna paidbah iaki Marks jong ki samla ba iakhun eksamin MCS.
