Kumba 5 ngut ki briew kiba shong ha kawei ka liengsuiñ (helicopter) ki la ïap hadien ba ka la hap ha ka sngi Balang ha ki lum kiba don shaphang shathie lam mihngi jong ka nongbah jong ka Nepal ong ka tyllong khubor naka ri Nepal.
Ia ki met iap jong ki saw ngut ki shynrang bad kawei ka kynthei la sei na katei ka helicopter kaba la pra hadien ba la wan poi ki pulit bad ki shipai bad la phah ruh ar tylli ki liengsuiñ sha katei ka jaka.
Katei ka jaka ba la hap ka liengsuiñ, ka dei ha ka thaiñ Suryachaur, kaba don tang shaphang shatei lam mihngi jong ka Kathmandu, bad ka don halor u lum ba la tap da ki khlaw.
Kane ka helicopter ka la kiew na ka kad liengsuiñ ka Kathmandu ha ka por 1:54 noh phai sngi kaba dang thmu ban leit sha ka shnong Syaprubeshi.
Kane ka helicopter, kaba dei ka Eurocopter AS350 jong ka Air Dynasty kaba don ha Nepal, ka la duh jingïadei bad u tower tang hadien lai minit ba ka la kiew, ong ka kyrwoh na ki bor pynïaid liengsuiñ jong ka Nepal.
4 ngut kiba shong ha katei ka Helicopter ki dei na China bad u nongñiah u dei na Nepal, ong ki heh sorkar ka Nepal.
