Ka Ïingbishar jong ka Meghalaya High Court, mynta ka 8 tarik Nailar, ka la pynlong ia ka jingbishar halor ka mukotduma ba la ujor da ka Kynhun Yatra pyrshah ia ka jingbym ai ia ka No Objection Certificate (NOC) ia ki paid riewngeit Hindu ban mane Blei hapoh ka krem Mawjymbuiñ kaba don hapoh ka shnong Mawsynram East Khasi Hills District.
Na ka liang ka Ïingbishar ka la khot hajir ruh ia ki bor nongpyniaid shnong ka Mawsynram, nangta ia ka Deputy Commissioner ka East Khasi Hills bad ia u Superintendent of Police of East Khasi Hills ban ai jingpynshai halor katei ka jingdawa NOC ka Kynhun Yatra.
Lah ban kdew, ba na ka liang ki bor ka Dorbar Shnong Mawsynram ha ki katto katne Sngi ban la leit ki la rai ban nym ai ia ka NOC ne ai jingbit ia ki paid riewngeit Hindu ban pynlong jaka mane Blei ha ka krem Mawjymbuiñ ia kaba ki paid Hindu ki ngeit ba ha kane ka krem u don u wei u maw ba ki ngeit Blei kum u Shiv Linga.
Katkum ka jingpyntip, da u Nongiasaid Aiñ ba la mihkhmat na ka Liang ka Dorbar Shnong Mawsynram, u VGK Kynta, u la iathuh, ba ka Ïingbishar jong ka Meghalaya High Court kam shym la rai eiei ha kane ka sngi hynrei la rah noh ia ka tarik ban bishar biang halor kane ka jingpan NOC na ka Dorbar Shnong Mawsynram ha ka 14 tarik Nailar bad ka Ïingbishar ka la bthah ruh ia ka Dorbar Shnong Mawsynram ban khot da kawei ka jingialang ia ki kynhun bapher bapher ban ia rai halor kane ka bynta ba angnud da ki paid riewngeit Hindu.
Lah ban sakhi ruh, ba kane ka mat jingangnud ban ioh NOC da ki paid riewngeit Hindu ban ioh leit mane Blei hapoh ka krem Mawjymbuiñ bad ba ka Dorbar Shnong Mawsynram ka la kyntait ban ai NOC ka la wanrah ia shibun ki kynrum kynram khamtam khamtam la iohi ba la mih ka jingthmu pyni bor ruh da kawei ka kynhun kaba la byrngem ban khang ia ka lynti na Assam ban rung sha Meghalaya.
