Ka kynhun ialehkai Hockey ka India, ka la ioh ban khur ia ka takma rnong ha ka Paris Olympic 2024, hadien ba ki la lah ban pynliem noh ia ka kynhun ialehkai ka Spain da 2-1.
Ha ka jingiakhun ban knieh ia ka takma rnong kaba la long mynta ka janmiet, ka kynhun ialehkai Hockey na ka ri Spain, ka la lah ban thep kol nyngkong ia kaba la thep da u Mirrales ha ka minit ba 18, kaba la pynlong ia ki rangialehkai Hockey ka India, ba kin nangtrei shitom shuh shuh, na bynta ban pynphai ia katei ka kol kaba ki la shah thep.
Katba ka jingiakhun ka la iaid shakhmat, ki rangialehkai ka India, ki la iakhun tyngeh ban pynphai ia kitei ki kol bad ha kaba kum katei ka jingiakhun, ka India ka la ioh ban pynphai nyngkong ha ka minit ba 30 lyngba u Harmanpreet Singh bad tang katto katne por, u la ioh biang ban thep ha ka minit ba 33 bad kaba la neh haduh ba kut katei ka jingiakhun ban knieh ia ka takma rnong.
Ki rangialehkai Hockey ka Spain, ki la iakhun tyngeh ban pynphai ia kitei ki kol ba ki la shah thep, hynrei da ka jingkyrshan ba tyngeh ki rangialehkai dien bad uba ap ha kol, ka la pynlong ia ki rangialehkai ka Spain ba kim lah ban leh eiei bad ba kin hap pdiang ialehkai ban shah rem noh da 2-1 hakhmat ki rangialehkai ka India.
Lah ruh ban kdew hangne, ba ka kynhun ialehkai ka India, ki la duh noh ban rung sha ka phainal, ka dei hadien ba ki la shah rem noh da 3-2 hakhmat ka kynhun ialehkai ka Germany.
