Ka Meghalaya Youth Tourism Development Society bad ka Miss Meghalaya Organization ha ka 09 tarik u Nailar 2024 ka la pynbna paidbah ba ka samla Irene Dkhar, kaba dei ka Miss Northeast barim, ka Miss Meghalaya bad ka Femina Miss India bad ruh ka Dr. Tanvi Marak, ka ba dei Miss Meghalaya barim, Miss Sunsilk Northeast, bad Femina Miss India Meghalaya, kin sa leit ban ia shim bynta ha kawei na ka jingiakop thei bhabriew ha ka ri ba la tip kum ka ‘Miss Grand India 2024’.
Ka Miss Grand India, ka dei kawei na ka rynsan iakop thei bhabrew ba la ju pynlong da ka Glamanand Entertainment Pvt. Ltd. bad ba la ithuh ruh kum kawei na ki lai tylli ki jingiakop thei bhabriew kaba paw bha ha ka ri India. Ka grand finale kan sa long ha ka 11 tarik u Nailar 2024 ha Zee Studio, Jaipur, Rajasthan, ha kaba kine ki ar ngut ki thei bhabriew na ka jylla Meghalaya kin sa leit ia shim bynta ha katei ka rynsan iakop thei bhabriew.
Ka Meghalaya Youth Tourism Development Society bad ka Miss Meghalaya Organization, ki la ai ka jingkhublei bad ka jingkitbok kitrwiang ia kine ki ar ngut ki thei bhabriew ka jylla ka Samla Irene Dkhar bad ka Dr. Tanvi Marak bad ki kyrmen skhem ruh ba kine ki samla kin wan rah nam ka burom na ka bynta ka ka jylla Meghalaya da kaba kin ioh khur ia ka jingjop bad ruh ba kin ioh ban mihkhmat ia ka ri India sha ka rynsan iakhun thei bha briew ba paw tam ha ka pyrthei.
Kumba kane ka jingiakhun thei bha briew ka la hajan bad ki paidbah ka jylla Meghalaya ki don ha syndah ban kyrshan ia kine ki samla kata ka samla Irene bad Tanvi, bad ki khmih lynti ruh ba ki thaw histori ha kane ka Miss Grand India 2024 ka ban long ka jingsarong bad ka burom ia ka jylla Meghalaya.
