Nonpoh, Nailar 10: Ki nongialam jong ka Seng Samla Shnong Pahamlapong-Pahamsohthri mynta ka sngi, ka 10 tarik jong u bnai Nailar 2024, ki la lah ban pynlong ia ka prokram ban pynkup burom kyrpang ia ki samla jong ka shnong kiba la lah ban wan shakhmat bad passbha ha ki eksamin SSLC bad HSSLC jong u snem 2023-24.
Kumba 20 ngut ki samla jong ka shnong ki la shah pynkup burom ha kane ka sngi, ha kaba la wan ban iadon ryngkat da u MLA ka Nongpoh konstitwensi, u Bah Maralborn Syiem kum u kongsan, u Bah HS Engleng, Auditor jong ka shnong, u samla Bankitbok Syiem, President ka seng samla lem bad kiwei kiwei de.
U Bah Mayralborn Syiem haba kren ha kane ka sngi, u la pynpaw ia ka jingsngewkmen ban iadon bynta lang ha kane ka sngi bad ai ka jingkitbok kitrwiang ia baroh ki samla pule kiba la lah ban passbha bad shah jied ban ioh ia ka khusnam ba kin iai bteng ban trei shitom bad minot thop ha ki jingpule ki jongki haduh ba kin da poi sha ka thong jong ka jingjop kumba ki angnud.
Ha kajuh ka por, u Bah Mayralborn Syiem u la ai ruh ki kyntien kyntu kynpham ia ki samla ba kin ialeh ban kiar na ka shongkha khynnah, ba kin kiar horkit hordang na ki jingdih ba sniew khamtam kum u drok, uba la kynrei haduh katta ha kine ki sngi kiba mynta, ha kaba bun na ki longing longsem ha ka imlang ka sahlang ki la shah ktah jur.
