Ka sorkar jylla ha ka sngi Saitjain ka la ai por 15 sngi sha ka Harijan Panchayat Committee (HPC)ban shim ia ka rai ba khatduh na ka bynta ban pynkynriah jaka ia ki 342 ki longing na Them Iewmawlong.
Ia kane ka rai ban ai por 15 sngi la shim rai da ka sorkar ha ka jingialang ba la pyniaid da u symbut myntri ka sorkar jylla ba de peit ruh ia ka tnad ka kam pohing , u Bah Prestone Tynsong.
Haba kren sha ki lad pathai khubor, u Symbut myntri ka sorkar jylla, u Bah Sniawbhalang Dhar u la ong ba ka jingiakynduh lang hynnin ka sngi Saitjain ka long kaba iaid beit bad kaba seisoh.
“ Ngi la ia rai ban ai por 15 sngi ia ka HPC ba kan shim ia ka rai kaba khatduh bad ba kan pynpaw ia kiei kiba dang duna sha ka sorkar jylla” ong u Bah Dhar.
U Bah Dhar u la pyntip ruh ba ka HPC ka la pan por 15 sngi na ka sorkar jylla, namar ki dang kwah ba ia kren katto katne ki kam kiba dang sah hapoh ka committee. Kin san ai ka jingpyntip sha ka sorkar la kin shim ia ka rai kaba ki ia hun lang ne ym ia hun lang bad ka sorkar ka kymen skhem ba kan long kaba biang bad ngi kwah ruh ba kin kren shai la ki hun ne ym hun ia katei ka rai ban pynkynriah jaka, u la ong.
U la ong ruh ba katei ka HPC ki la pynpaw ia ka jingkmen halor kane ka jingpynkynriah jaka kaba dei katkum ka blueprint ka sorkar jylla.
Haba kylli, u Dhar u la ong, “ jan baroh ki kam ba la ia kren ha kane ka sngi ki dei kiba la ia kren da ka lynti kaba shai, ka HPC ka donkam ban ia thir sani para ma ki, ha kaba ngi la ai por 15 sngi bad nalor kane kamn nym don shuh ka jingiakynduh lang. ngin sa shim noh ia ka rai kaba khatduh hapoh kane ka 15 sngi”.
Shuh shuh, u Symbut myntri ka sorkar u la ong ba ka sorkar kan nym pdiang ia kino kino ki jingai jingmut na kiwei ki kynhun ba na shabar ka jylla. Ka jingiatai ne ia thir kan dei beit tang ka sorkar jylla bad ka HPC bad na ka liang ka sorkar kan nym sngap ia kino kino kiba wan na shabar” u la pynshai.
