Kumba ar ngut ki shipai India kila duh noh iala ka jingim ha ka jingiakhun pyrshah ia ki lehnoh muslim ha Anantnag District jong ka jylla Jammu & Kashmir. Ha kane ka jingjia, uwei u riew paidbah uba la shah siat bad mynsaw jur, u la khlad noh mynta ka sngi hapdeng ka jingsumar.
Kane ka jingiasiat hapdeng ki shipai India bad ki lehnoh muslim na ka ri Pakistan kiba la ioh ban rung tuh sha u pud u sam ka ri India, kadei kaba la sdang naduh hynnin ka sngi ha ki bynta jong ka khlaw Ahlan Gagarmandu jong ka Anantnag District.
Utei u riew paidbah uba la khlad noh, la tip kyrteng kum u Adul Rashid Dar katba sa uwei pat u riew paidbah uba la mynsaw, mynta u dang don hapdeng ka jingshah sumar ha ki jaka ai jingsumar jong katei ka thain katba ki ar ngut ki shipai kiba la khlad noh, la tip kyrteng kum u Havildar Dipak Kumar Yadav bad u Lance Naik Praveen Sharma.
Katkum ka tyllong khubor na ki shipai, la iathuh ba hadien ka jingioh jingtip, ki shipai ryngkat bad ki pulit ka jylla Jammu & Kashmir ki la pynlong ia ka jingleit khynra sha katei ka jaka, bad mar ia kumta hi, ki lehnoh muslim kiba dei na ka seng Laskar-e-Taiba ki la ther kuli naphang, bad na ka ki bor shipai ruh ki la ther kuli kylla pyrshah ia kitei ki lehnoh.
Kumba long mynta, na ka liang ki bor shipai ka ri India ryngkat bad ka kynhun Commando, ki la ioh ban pyniap ia uwei na kitei ki lehnoh Pakistan, bad ka jingkhynra ba iohkem lane pyniap lut ia baroh kitei lehnoh ha katei ka jaka, ka dang iaid shakhmat.
