Katkum ka khubor ba la ioh lum, ki runar hynnin ka miet ki la thmu ban pynpra ia ka dur mot jong u (L) J.N Bawri, kaba don ha khmat ka Bawri Mansion ha Dhanketi, da kaba ki la kawang da u petrol bom.
Ha kane ka jingkwang da u petrol bom ia katei ka dur mot u J.N Bawri, ka don tang katto katne ka jingjulor bad kumba la paw, kane ka lah ban long ba ki runar ki pyrshang ban pyntieng pynsmiej ia ki paidbah ha kata ka rukom kaba ki la leh da kine ki kam runar jongki.
La ong ruh kumba shi bnai ei ei mynta, ki runar ki la ju pyrshang ban pyntieng pynsmiej da kaba kawang petrol bom bad la kynnoh ruh ba ki la leh ia kane ka kam ha ki jaka ba shong basah da ki bym dei trai jylla. Ha kane ka jingleh kam runar kitei ki runar, ka don tang ka jingpait noh ka ïit jong ka ATM ba buh hajan katei ka building.
Halor kane ka jingpyrshang hiar thma ki runar, ki trai jong katei ka Bawri Mansion ki la dep ba ujor da ejehar ha Laitumkhrah Police Station. Ki bor pulit ka East Khasi Hills ki la sdang ban pynlong ia ka jingtohkit khnang ban ioh kem ia kine ki runar kiba la don kti ha kane ka kam runar, ong ka tyllong khubor ba la ioh lum.
