Ha ka jingiakhun ba khatduh jong ka kynhun ialehkai jong ka Bodoland Football Club ha ka Group-E, kaba la long ha SAI Stadium Kokrajhar, ka Bodoland FC ka la lah ban pynliem noh ia ka BSF Football Team da 4-3.
Kumba ka long mynta ka Bodoland FC, ka la jop arsien kata pyrshah ia ka Odisha FC bad ia ka BSF FT ba ka la iakhun mynta ka janmiet, hynrei ka la shah rem noh ha ka jingiakhun kaba nyngkong hakhmat North East United Football Club.
Ban pynthikna ialade ban rung sha ka Quarter Final, ka Bodoland FC ka donkam ban ap sa ia ka jingiakhun hapdeng ka Odisha FC pyrshah ia ka North East United FC, kaba mut lada ka Odisha kan shah rem ne iakhaid hakhmat ka North East United FC, ka jingkhang kan plie ia ka Bodoland FC ban rung ialade sha ka Quarter Final, hynrei lada ka Odisha FC kan jop ia ka North East United FC, ka jingdonkam ka long ban hap khein ia ka jingshah thep kol bad ioh ban thep kol.
Khyndiat kum ban shu kdew hangne, ba ia ka Bodoland FC la hikai ne la long Coach da u Bah Khlain Pyrkhat Syiemlieh, u Coach ba la pawnam eh ha ka jylla bad nalorkata ia ka Bodoland FC, la don ruh uwei u samla Khasi uba la tip kum u Wanboklang Lyngkhoi, uba la lehkai bha eh bad uba la ioh ruh ia ka nam Man of the Match ha ka jingiakhun pyrshah ia ka Odisha FC.
