Kawei ka Kali ka la hap noh sha riat ha khlaw Umling hynnin ka miet, kaba dei hadien ba katba ka dang iaid ha ka surokbah, la wan ban tynrah kynsan da kawei ka Trok, kaba la pynlong ia katei ka Kali ban tynrah ia ka kynroh ka surokbah haduh ba ka la hap syndon sha riat ba la don kumba 50 metre.
Kane ka Kali ba la shah tynrah ka don ia u number AS 01 EH 1855, ba la niah da u Rahul Roy, 21 snem ka rt ana ka shnong Sutarpara, Guwahati, Kamrup Assam bad hapo kane ka Kali la don ruh 4 ngut kiba la shong hapoh jongka, hynrei donbok noh wat la kane ka Kali ka hap sha riat kitei kiba shong hapoh katei ka Kali ki la shu mynsaw malu mala.
Kane ka jingjia ka la jia ha ka 16 tarik u Nailar 2024 ha ka por 7.30 baje janmiet bad katba dang hiar na Shillong sha Guwhati, katei ka Kali kala ngat ha ka apot ban shah tynrah ha kawei ka Trok kaba la phet krad bad ba katei ka Kali ka la hap sha riat hapoh ki bynta jong ka khlaw Umling.
Ia kitei kiba la mynsaw la rah noh sha Civil Hospital Nongpoh ban ioh ia ka jingsumar bad kumba la pyntip da ki Doctor la ong ba donbok ba ki la shu mynsaw malu mala ha kane ka jingjia.
Shuh shuh, na ka liang ki Pulit ka Ri Bhoi ki dang pynlong ia ka jingtohkit bad thwet ruh ia katei ka Trok kaba la phet krad bad ia katei ka Kali ba la hap sha riat la sei noh mynta ka sngi, ha kaba ka jingtohkit halor kane ka jingjia ka dang iaid shakhmat ban ioh kem ia katei ka trok.
