Haba kut noh ka jingiakhun ki kynhun kiba don ha ka Group-E, kaba la long mynta ka janmiet hapdeng ka Shillong Lajong Football Club pyrshah ia ka FC Goa, ka jingiakhun ka la kut noh ha ka jingiakhaid da 1-1.
Ka jingiakhun hapdeng kitei ki ar-kynhun ka long ban knieh ia ka nam kum ka kynhun kaba hakhlieh duh ha ka Group-E, namar ki dei ki kynhun kiba la pynthikna ialade ban rung sha ka Quarter Final, hynrei na ka jingiakhaid kaba mynta ka miet, ka Shillong Lajong FC, ka la ioh ia ka kyrdan kaba hakhlieh, na ka jingiakhein ha ka jingioh thep kol bad shah thep kol.
Haba phai sha ka jingiakhun kaba la long hapdeng ka Shillong Lajong FC pyrshah ia ka FC Goa, ka jingiathep kol ka la dei ha ka kylla step jong ka jingiakhun, ha kaba ka Shillong Lajong FC ka la ioh ban thep na ka minit ba 29 lyngba u D. Goncalves Silva, katba ka FC Goa ka la ioh ban pynphai ia katei ka kol lyngba u Devandra ha ka minit ba 33 bad kiba la pynkut noh ia ka kylla step ha ka jingiakhaid da 1-1.
Haba bteng ka kylla miet, ka jingiakhun ka la nang itynnad namar kitei ki kynhun ki kwah ban khur ia ka namjop, hynrei haduh ba kut ki 90 minit, kim lah shuh ban pynkhih jar bad kiba la hap ban hun noh ia ka jingiakhaid kaba 1-1.
