Kum kawei na ka thong ban ai mynsiem ia ki samla bym don kam don jam ba kin tip ban thaw ia ki lad ki lynti halor ki lad sengkam sengjam, ka Ri Bhoi College lyngba ka Entrepreneurship Development Centre (EDC) bad ka IQAC, mynta ka sngi ka la pynlong ia ka prokram ai jinghikai kyrpang ia ki samla pule halor ki lad sengkam sengjam halor ka phang ‘Exploring Opportunities’.
Kane ka prokram ai jinghikai halor ki lad sengkam sengjam (entrepreneurship) ka dei ka prokram kaba lai sngi kynthih, kaba la sdang mynta ka sngi ha Ri Bhoi College.
U Deputy Commissioner ka Ri Bhoi, u Abhilash Baranwal u la wan ban shim bynta kum u kongsan ban plie ia kane ka prokram ai jinghikai bad la sakhi lang ruh da ka jingdon lang u E.C. Benny, Principal ka Ri Bhoi College, ka kong W. Blah, Principal Alpha Higher Secondary School, Nongpoh, ka kong W Nongkynrih IQAC Coordinator, lem bad ki samla pule na ki jaka pule bapher bapher ka Ri Bhoi.
Haba ai jingkren ha kane ka sngi kum u kongsan, u Deputy Commissioner ka Ri Bhoi u Abhilash Baranwal u la ai khublei ia ka Ri Bhoi College kaba la shim ia kane ka sienjam ban ai jinghikai sha ki samla halor ki lad sengkam sengjam lajong bad kum kine ki prokram ki long kiba donkam bha khnang ba ki khun samla kiba ym don kam don jam kin ioh mynsiem ban ieng ha la ki kjat ha kaba sengkam sengjam.
Shuh shuh, u la kyntu ruh ia ki samla pule kiba la wan ban shim bynta ha kane ka prokam ba kin pyndonkam hok ia ki lad jinghikai ba ki la ioh lum jingtip na kane ka prokram ai jinghikai bad u kyrmen skhem ruh ba lada don kum kine ki prokram kan long shisha ka jingmyntoi ia ki samla ba kin sngewthuh halor ka jingkordor ka sengkam sengjam lajong ha kum kane ka pyrthei kyrdu kam kyrduh jam, u la bynrap.
