Na ka daw ka jingjur slap ha kine ki sngi ba ka um ka la kiew ha pung Umiam sha ka 3209.68 feet ha ka por 12 baje jong ka 13 tarik u Nailar 2024, ka lah ba don ka jingpynlait um ha ka jingkieng heh ha Umiam ha kano kano ka por khnang ban lait ka jingshlei um na katei ka pung Umiam.
Katkum ka kyroh ba la phah da u Bah K. Thankhiew Chief engineer (C), Hydro planning and Hydro Construction MePGCL, Shillong, la ong ba kane ka dei ka jingpyntip paidbah khamtam kito ki nonghsong shnong kiba shong basah sharum ka jingkieng Umiam la bthah ia ki ba kim dei ban leit sharud ka wah umiam, namar ka lah ban kiew ka jingheh ka um lada la pynlait um na katei ka pung Umiam.
La pyntip ruh na ka liang kane ka ophis kan sa ai jingtip ruh sha ki bor district bad sha baroh ki paidbah lyngba ki rangbah shnong shuwa ban plie ia katei ka jingkhang pynlait um ha pung Umiam kaba long kum ki lad jingiada ban lait na kino kino ki jingjia ba sngewsih.
Shuh shuh, la ong ruh ba ka tnad MeECLP ka kyrpad ia ki paidbah ba kim dei ban leit ha shi lynter ka wah Umiam, ha kaba kan don ka jingpyrshang ban pynlait ia ka um ha ka 23 tarik u Nailar 2024 ba ka um ka lah ban kiew ne shlei ha ki bynta ba sharum jong ka wah Umiam.
