U Myntri ka tnad ba dei peit ka bording ilektrik haka jylla, u A.T Mondal ha ka sngi Baar, u la ong ba ka sorkar jylla kam don jingthmu satia ban pynbha biang ia ka Kynshi Stage-I, hynrei ka sorkar ka la shim khia biang ban dang kyntiew ia ka power projek ha ka Kynshi Basin.
Ia kane u myntri ka tnad bording u la pyntip sha ka jingwan kynduh ka Joint Committee of Local People on Kynshi Hydro Power Project (JCLPKHPP), kiba la leit ban kynduh ia u na ka bynta ban tip shai la ka sorkar ka dang don neem ka jingangnud ban pynbha biang ia ka Kynshi Hydro Power Project stage-I.
Haba kren sha ki lad pathai khubor, u A.T Mondal u la ong, “Nga la iathuh ia ka committee ba haduh mynta ka sorkar kam don kano kano ka jingthmu ban pynbha ia ka Kynshi Hydro Powew Project stage-I, hynrei ka sorkar ka thaw biang ia ki lad ki lynti ban don noh da kiwei ki projek ha ka wah Kynshi”.
U la iathuh ruh ba lyngba ka jingwan kynduh kane ka Committee ki la pynthikna ba kin ai ka jingiatrei bad ka jingkyrshan lang na ka bynta kiwei pat ki projek bording ha ka wah Kynshi.
Shuh shuh, u la iathuh ruh lyngba kane ka jingiakynduh lang, ka la long ka jingiakynduh kaba seisoh bad u kyrmen skhem ruh ban mih noh da kiwei ki projek bording ha ka wah Kynshi khnang ban lah shuh shuh ban pynbiang bording hapoh ka jylla.
